काठमाडौं– सर्वोच्च अदालतको संवैधानिक इजलासबाट प्रधानन्यायाधीशलाई अलग गर्न नमिल्ने तथा प्रधानन्यायाधीशको अनुपस्थिमा सुनुवाइ हुन नसक्ने दाबी गरिएको रिट खारेज भएको छ।
सर्वोच्च अदालतका कायममुकायम प्रधानन्यायाधीश दीपककुमार कार्की नेतृत्वको संवैधानिक इजलासले अधिवक्ता गणेश रेग्मी र दीपकविक्रम मिश्रले दायर गरेको रिट खारेज गरेको हो।
संवैधानिक परिषद्सम्बन्धी अध्यादेश र अध्यादेशानुसार भएका नियुक्तिविरुद्ध दायर भएका रिटको सुनुवाइका क्रममा तत्कालीन प्रधानन्यायाधीश (हाल निलम्बित) चोलेन्द्र शमशेर राणा संवैधानिक इजलासबाट अलग हुनुपर्ने 'परिस्थिति' सिर्जना भएपछि रेग्मी र मिश्रले सर्वोच्चमा रिट दायर गरेका थिए।
संवैधानिक परिषद्सम्बन्धी अध्यादेश तथा अध्यादेशानुसार भएका नियुक्ति विरुद्धका रिटमा विपक्षी बनाइएका कारण प्रधानन्यायाधीश राणाले संवैधानिक इजलासबाट अलग हुनुपर्ने माग रिट निवेदक तथा निवेदक पक्षका कानुन व्यवसायीले गरेका थिए। संवैधानिक इजलासमा सुनुवाइकै क्रममा आफूमाथि प्रश्न उठेपछि राणाले मौखिक आदेश गर्दै संवैधानिक इजलासबाट अलग हुने भनेका थिए।
त्यसलगत्तै अधिवक्ता रेग्मी र मिश्रका २ थान रिट दर्ता भएका थिए। उनीहरुको रिटमा सुनुवाइ गर्दै न्यायाधीश हरि फुयाँलको एकल इजलासले संवैधानिक इजलासबाट प्रधानन्यायाधीश अलग हुन मिल्ने/नमिल्ने भन्ने विवादको टुंगो नलागुञ्जेल संवैधानिक इजलासलाई सुनुवाइ नर्गनू भनि अन्तरिम आदेश जारी गरेको थियो। एकल इजलासको आदेशले संवैधानिक इजलासको सुनुवाइ रोकिएपछि न्यायिक वृत्तमा तरंग नै ल्याएको थियो।
संवैधानिक इजलासलाई एकल इजलासले मुद्दाको सुनुवाई गर्न रोक्नु न्यायिक अराजकता भएको भन्दै उक्त एकल इजलासको आदेश खारेजीको माग नेपाल बारले पनि गरेको थियो।
३० मंसिर २०७७ मा जारी भएको संवैधानिक परिषद्सम्बन्धी अध्यादेश र त्यस पछिका नियुक्तिमा संलग्न हुँदै हिस्सेदारी नै लिएका राणामाथि पनि प्रश्न उठेपछि यो विवाद झन् पेचिलो बनेको थियो।
प्रधानन्यायाधीश राणाले आफू अलग हुने घोषणा गरेको अवस्थामा फेरि रिटमार्फत् एकल इजलासले संवैधानिक इजलासको उक्त आदेश कार्यान्वयन नगर्न आदेश गरेपछि यो विवादले नयाँ मोड लिएको थियो। यो विवादमा संवैधानिक इजलासले रिट खारेज गरेपछि प्रधानन्यायाधीश संवैधानिक इजलसामा संलग्न हुनैपर्ने 'अनिवार्य अवस्था' नहुने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
