काठमाडौं– नेपाली कांग्रेसका उपसभापति धनराज गुरुङले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लाई भिकारीसँग तुलना गरेका छन्।
स्व. गिरिजाप्रसाद कोइरालाको स्मृति दिवसका अवसरमा काठमाडौं माइतीघरमा सोमबार आयोजित कार्यक्रममा बोल्दै गुरुङले कहिले कचौरा लिएर नेकपा (एमाले)का अध्यक्ष केपी शर्मा ओली निवास बालकोट त कहिले प्रधानमन्त्री शेरबहादुर देउवाको सरकारी निवास बालुवाटार पुग्ने गरेको भन्दै प्रचण्डलाई भिकारीसँग तुलना गरेका हुन्।
‘बृहत शान्ति सम्झौतामा एकपट्टी गिरिजाप्रसाद कोइरालाले हस्ताक्षर गर्नुभएको थियो भने उता अर्कोतर्फ पुष्पकमल दाहालजीले हस्ताक्षर गर्नुभएको थियो,’ उनले भने,‘त्यहीँ हस्ताक्षर गर्ने गिरिजाले पार्टी हारेपनि देश हार्न हुन्न भन्नुहुन्थ्यो। तर, तपाईं (प्रचण्ड)लाई देखेर विचरा भन्न मन लाग्यो। उहाँ देश हारेपनि हारोस् तर आफू हार्न हुन्न भनेर कहिले कचौरा लिएर बालकोट पुग्नु हुन्छ कहिले बालुवाटार !’
यसरी नै हिँडे बैशाख ३० गते तय भएको स्थानीय तहको निर्वाचनमा कतै तालमेल नभएर माओवादी रित्तो हात फर्किन पर्ने अवस्थासमेत आउने तर्फ सचेत रहन उनले आग्रह गरेका छन्।
‘कहिले शेरबहादुर देउवाकोमा माग्न जाँदा कहिले केपी शर्मा ओलीकोमा माग्न जाँदा कतैबाट सहयोग नमिलेर तपाईंको कचौरा खालि नहोस् भन्ने कामना गर्दछु,’ उनले भने।
उनले पद डकार्ने जो कोहीको कद नबढ्ने समेत बताएका छन्। त्यसैले उनलाई बेलैमा सुध्रिनसमेत गुरुङले आग्रह गरेका छन्।
‘कदसँगै पद बढोस् भन्ने मेरो चाहना हो। गिरिजाप्रसाद कोइरालासँगै शान्ति प्रकियामा हस्ताक्षण गर्नुभएको कारण उहाँको पनि नाम आउने गर्छ। त्यही कारण तपाईं (प्रचण्ड)लाई सचेत गराएको हुँ। देशमा समृद्धि हासिल गर्ने हो भने व्यक्तिगत र पारिवारिक स्वार्थभन्दा माथि उठ्न आवश्यक छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
