काठमाडौं– नेपाली राष्ट्रिय फुटबल टिमका प्रमुख प्रशिक्षक अब्दुल्लाह अल्मुताइरीले गत कात्तिकमा अखिल नेपाल फुटबल संघ (एन्फा) सँग नयाँ सम्झौता गर्दै दोस्रो पटक जिम्मेवारीमा फर्किएका थिए। त्यसपछि उनी ‘लङटर्म प्लानिङ’ बनाएर टिमको प्रदर्शन सुधार्न लागेका छन्। उनको प्रथामिकतामा आगामी जुनमा हुने एएफसी एसियन कप २०२३ को तेस्रो चरण, सन् २०२६ मा हुने विश्वकपको छनोट प्रतियोगिता र सन् २०२७ को एसियन कपको छनोट प्रतियोगिता छन्।
अहिले नेपालको राष्ट्रिय टोली थाइल्यान्ड भ्रमणमा छ। त्यहाँ दुई वटा मैत्रीपूर्ण खेल हुने तालिका छ। ती खेल चीनमा हुने एसियन कप २०२३ को तेस्रो चरणको छनोट प्रतिश्पर्धाको तयारीका लागि खेलिन लागेको हो।
अल्मुताइरीले यी प्रतियोगितालाई महत्त्व दिएका कारण तयारी पनि विशेष बनाउने प्रयासमा छन्। त्यसैले ‘फिफा डे’ का मैत्रीपूर्ण खेललाई जोड दिइरहेका छन्। त्यसै कारण गत माघमा घरेलु मैदान दशरथ रंगशालामा मरिसससँग दुई मैत्रीपूर्ण खेल खेलेको नेपाल अहिले थाइल्यान्ड उडेको हो।
नेपालले आगामी चैत १० मा थाइल्यान्डको राष्ट्रिय टोली र १३ गते थाई शीर्ष डिभिजनको क्लब चोनवुरी एफसीसँग प्रतिश्पर्धा गर्नेछ। यी खेलले नेपाली टोली कति बलियो र निखारिएको छ भन्ने देखाउने छ। तर, यस पटक उनका भरपर्दा खेलाडी टिममा छैनन्।
मरिससविरुद्धको पहिलो खेलमा गोल गरेका विमाल घर्तीमगरसहित उक्त टोलीमा रहेका सात महत्त्वपूर्ण खेलाडीले थाइल्यान्ड भ्रमण गुमाएका छन्। मछिन्द्र क्लबले एएफसी कपका लागि तयारी गरिरहेकाले राष्ट्रिय टोलीमा यसपटक विशाल श्रेष्ठ, विशाल राई, विमल घर्तीमगर, सुनिल बल, मनिष डाँगी, सुजल श्रेष्ठ, रञ्जित धिमाललगायत खेलाडी उपलब्ध नहुने भएका हुन्। मछिन्द्रले चैत २२ मा एएफसी कप छनोटको प्रारम्भिक चरणअन्तर्गत श्रीलंकाको ब्लूस्टार एफसीसँग दशरथ रंगशालामा प्रतिस्पर्धा गर्नेछ।
तर, मछिन्द्रका खेलाडी नभए पनि आफूलाई बहाना बनाउने छुट नभएको अल्मुताइरी बताउँछन्। मछिन्द्रलाई ‘फोकस’ गर्नुभन्दा आफ्नो राष्ट्रिय टोलीलाई नियाल्नुपर्ने उनको तर्क छ। ‘यो नेपालको राष्ट्रिय टोली हो। मछिन्द्रका खेलाडी छैनन् भनेर म रोएर बस्दिनँ। यो सामान्य हो। उनीहरू एसियन कप छनोटमा नभए पनि मलाई केही फरक पर्दैन,’ उनले थाइल्यान्ड उड्नुअगाडि भने,’ नेपाली राष्ट्रिय टोली सबैभन्दा ठूलो हो। क्लब र प्रशिक्षकभन्दा पनि ठूलो हो।’
उनको ‘हतियार’ भनेकै युवा खेलाडी हुन्। अल्मुताइरी नेपाल आएसँगै संभावना बोकेका युवा खेलाडीलाई प्राथमिकता दिँदै आएका छन्। थाइल्यान्डमा हुने खेलमा पनि नेपालको लागि यी खेलाडी महत्वपूर्ण हुनेछन्। ‘एएफसी कपका कारण मछिन्द्रका खेलाडी टोलीमा नहुँदा हामी नयाँ रणनीतिमा हुनेछौं। टोलीमा नयाँ खेलाडीहरू थपिएका छन्। यो हाम्रो तयारीको उत्कृष्ट पक्ष हो। जित र हार त खेलको पाटो नै हो,’ उनी भन्छन्।
यसअघि नेपालले थाइल्यान्डसँग तीन खेल खेलेको छ। तीनै खेलमा नेपाल पराजित भएको छ। सन् १९८२ मा किङ्स कपमा पहिलोपटक प्रतिश्पर्धा गर्दा नेपाल ३–१ गोल अन्तरले पराजित भएको थियो। त्यसपछि सन् १९९८ मा मैत्रीपूर्ण खेल खेलेको नेपाली टोली २–० ले पराजित भएको थियो। अन्तिम पटक सन् २००८ मा खेल्दा ७–० को फराकिलो गोल अन्तरले हारेको थियो।
करिब १४ वर्षपछि थाइल्यान्डविरुद्धको खेलमा ‘टचलाइन’मा उभिरहँदा प्रशिक्षक अल्मुताइरीसँग घरेलु मैदानबाहिर नेपाली राष्ट्रिय टोलीलाई मैत्रीपूर्ण खेलमा पहिलो जित दिलाउने लक्ष्य पनि हुनुपर्ने छ। थाइल्यान्ड नेपालभन्दा बलियो टोली भएकाले उनलाई त्यो लक्ष्य भेट्न सहज भने छैन।
अल्मुताइरी प्रशिक्षकमा नियुक्त भएपछि विदेशमा खेलिएका पछिल्ला दुई मैत्रीपूर्ण खेलमा नेपालले ‘लज्जाजनक’ हार बेहोरेको छ। उनको प्रशिक्षणमा नेपाल इराकसँग ६–२ र ओमानसँग ७–२ गोल अन्तरले हारेको थियो। मरिससबाहेक घरेलु मैदानमा भारतसँग खेलिएको दुई मैत्रीपूर्ण खेलमा पनि नेपालले २–१ र १–१ को मिश्रित नतिजा हात पारेको थियो।
तर, यसअघिका मैत्रीपूर्ण खेलजस्तै यसपटक पनि आफूले नतिजालाई भन्दा बढी प्राथमिकता वरीयता सुधारलाई दिएको अल्मुताइरी बताउँछन्। ‘हाम्रो लक्ष्य एसिया कप छनोटको तयारी हो। थाइल्यान्डविरुद्धको खेल नेपाली टोलीका लागि वरीयता सुधार गर्ने मौका पनि हुनेछ। त्यस्तै, एएफसी छनोटमा उत्कृष्ट प्रदर्शन गर्ने मद्दत गर्नेछ,’ उनले भने,‘थाइल्यान्ड त्यही क्षेत्रको हो, जहाँ इन्डोनेसिया पर्छ र उनीहरू जोर्डन र कुवेतको वरीयतामा छन्। त्यसैले हाम्रो लागि यो प्रतियोगिता निकै महत्त्वपूर्ण छ।’
एएफसी एसियन कप तेस्रो चरण छनोट प्रतियोगितामा नेपाल कठिन समूहमा छ। समूह ‘ए’ मा नेपालसहित कुवेत, जोर्डन र इन्डोनेसिया छन्। ८ जुनमा सुरु भएर १४ जुनमा सकिने यो समूहका खेल कुवेतमा हुनेछन्।
नेपालले आफ्नो पहिलो खेलमा जोर्डनसँग ८ जुनमा कुवेत सिटीमा प्रतिस्पर्धा गर्नेछ। यस्तै, ११ जुनमा जोर्डन र १४ जुनमा इन्डोनेसियासँग प्रतिस्पर्धा गर्नेछ। थाइल्यान्ड भने समूह ‘सी’मा छ। यो समूहमा उज्वेकिस्तान, माल्दिभ्स र श्रीलंका पनि छन्।
समूहमा शीर्ष हुने टोली एसियन कपका लागि छनोट हुनेछ। दोस्रो हुने टोलीको पनि छनोट हुने संभावना हुनेछ। तेस्रो चरणमा प्रतिस्पर्धा हुने ६ समूहमध्ये दोस्रो हुने उत्कृष्ट पाँच टोली एसियन कपमा पुग्नेछन्।
बलिया प्रतिस्पर्धीसँग खेल्नुअघि थाइल्यान्डसँगको खेल नेपाल टोलीलाई आफ्नो वास्तविकता बुझ्ने अवसर हो। थाइल्यान्ड फिफा वरीयताको ११२औं स्थानमा छ। नेपाल १६७औं स्थानमा छ। यसलाई बुझेका प्रशिक्षक अल्मुताइरी थाइल्यान्डसँगको नतिजा बराबरी गर्ने लक्ष्यका साथ मैदान उत्रिने पक्का छ।
थाइल्यान्ड आसियन क्षेत्रको एएफएफ कप विजेता देश हो। डिसेम्बरमा भएको पहिलो लेगमा इन्डोनेसियालाई ४–० ले हराएको थाइल्यान्ड समग्रमा ६–२ ले विजयी बनेको थियो। थाइल्यान्डले दुई महिनाअघि उक्त प्रतियोगिताअन्तर्गत नै दोस्रो लेगमा इन्डोनेसियासँग प्रतिस्पर्धा गरेको थियो। सिंगापुरको कालाङमा भएको दोस्रो लेग २–२ गोलको बराबरीमा सकिएको थियो।
अल्मुताइरी यस नतिजाबारे पनि जानकार छन्। थाइल्यान्डले इन्डोनेसियासँग खेलेको खेलको विश्लेषण गरिरहेको उनले बताएका छन्। ‘थाइल्यान्डले त्यो टोलीमा भएका खेलाडीमध्ये अहिले १२ देखि १५ जनालाई परिवर्तन गरिसकेको छ,’ उनले भने, ‘उनीहरू ११ खेलाडी, हामी पनि ११। त्यसैले जित पनि हुनसक्छ। यो फुटबल हो।’
नेपाल आगमनपछि अल्मुताइरीको नेतृत्वमा नेपालको उपलब्धि भने सम्झनलायक छैन। अहिलेसम्म खेलेका १४ खेलमा पाँच जितमात्र हासिल गरेका छन्। यद्यपि, नेपालले वरीयतामा माथि भएका देशसँग खेलेको छ। नेपालले प्रायः खेलमा गोल भने गरेको छ। मरिसससँगको पछिल्ला दुई खेलमा २ गोल गरेको नेपालले ‘क्लिनसिट’समेत राखेको छ। तर, अल्मुताइरीको नजर अहिले जितमा छ कि ‘क्लनसिट’मा छ यो थाइल्यान्ड भ्रमणले स्पष्ट पार्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
