काठमाडौं- सहिद स्मारक ‘बी’ डिभिजन लिगअन्तर्गत विवादित खेलमा वीरगञ्ज युनाइटेडले पहिलो जित हात पारेको छ।
एन्फा कम्पलेक्समा बुधबार सम्पन्न खेलमा सामाजिक युथ क्बललाई १–० गोल अन्तरले पराजित गर्दै वीरगञ्जले जारी प्रतियोगितामा पहिलो जित हात पारेको हो।
वीरगञ्जको जितमा एकमात्र निर्णायक गोल कृपाकान्त महतो थारुले गरे।
उनले खेलको ७१औं मिनेटमा गरेको गोल नै वीरगञ्जको जितका लागि पर्याप्त रह्यो।
७८औं मिनेटमा सामाजिक युथका खेलाडीलाई रेफ्रीले पहेलो कार्ड देखाएका थिए। उक्त निर्णयविरुद्ध सामाजिक युथका खेलाडी तथा पदाधिकारीले रेफ्रीसँग विवाद गरेका थिए।
जितसँगै वीरगञ्जले ३ खेलबाट ४ अंक जोडेको छ। वीरगञ्जल अंक तालिकाको चौथों स्थानमा उक्लिएको छ। यता, ३ खेलमा १ अंक जोडेको सामाजिक युथ तालिकाको पुछारमा पुगेको छ।
यसअघि लिगको पहिलो खेलमा वीरगञ्ज ब्वाइज युनियन क्लबविरुद्ध १–० ले पराजित भएको थियो। यता, दोस्रो खेलमा नयाँबस्ती युथ क्लबसँग २–२ को बराबरीमा रोकिएको थियो।
यस्तै, सामाजिक पहिलो खेलमा मध्यपुर युथ एसोसियसनसँग ५–२ ले पराजित भएको थियो। दोस्रो खेलमा भने श्री कुमारीसँग ३–३ को बराबरी खेलेको थियो।
खुमलटारसँग बाँसबारी पराजित
बुधबार नै भएको पहिलो खेलमा खुमलटार युथ क्लबले बाँसबारी क्लबलाई १–० पराजित गरेको छ।
सातदोबाटोस्थित एन्फा कम्प्लेक्समा सम्पन्न खेलको २९ मिनेटमा सदीन केसी गरेको गोल नै खुमलटारको जितमा निर्णायक बन्यो।
जितसँगै ३ खेलबाट ६ अंक जोडेको खुमलटार तालिकाको दोस्रो स्थानमा उक्लिएको छ। यता, समान खेलबाट १ अंक जोडेको बाँसबारी तालिकाको १३औं स्थानमा छ।
यसअघि बाँसबारी पहिलो खेलमा सरस्वती युथ क्लबसँग ३–१ ले पराजित भएको थियो। दोस्रो खेलमा भने टुसाल युथ क्लबसँग गोलरहित बराबरीमा रोकिएको थियो।
यस्ता, खुमलटारले पहिलो खेलमा रानीपोखरी युथ क्लबलाई ३–१ ले पराजित गरेको थियो। तर, दोस्रो खेलमा चर्च ब्वाइज युनाइटेडसँग २–० ले पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
