काठमाडौं– ललितपुरको कोन्जोसोम गाउँपालिका–४ नल्लुमा एकै परिवारका पाँच जना मृत भेटिएका छन्। नल्लु बस्ने काइली स्याङतानको परिवारका सदस्य मृत भेटिएपछि वडाध्यक्ष तीर्थबहादुर घलानले प्रहरीलाई खबर गरेका थिए। आइतबार खाना खाएर सुतेका एकै परिवारका ६ जना सदस्यमध्ये सोमबार बिहान साढे ९ बजेतिर वडाध्यक्ष घलानले चार जना मृत र दुई जना अर्धचेत अवस्थामा देखेपछि इलाका प्रहरी कार्यालय कोन्जोसोममा खबर गरेका थिए।
कोन्जोसोमबाट प्रहरी निरीक्षक (इन्सपेक्टर) सहितको टोली तत्कालै घटनास्थल पुगेको थियो। पछि महानगरीय प्रहरी वृत्त चापागाउँबाट प्रहरी नायव उपरीक्षक (डीएसपी) र महानगरीय प्रहरी परिसर ललितपुरबाट प्रहरी वरिष्ठ उपरीक्षक (एसएसपी)सहितको टोली घटनास्थल जाँदै गरेको परिसर ललितपुरका प्रवक्ता तथा एसपी शिद्धिविक्रम शाहले जानकारी दिए। उनका अनुसार फरेन्सिक विज्ञ र डाक्टरसहितको टोली घटनास्थलमा जाँदै छ।
घटनाको प्रकृति हेर्दा निसासिएर वा कुनै विषादीको कारणबाट उनीहरुको मृत्यु भएको हुनसक्ने प्रहरीको प्रारम्भिक अनुमान छ। ‘घटना प्रकृति हेर्दा हत्या गरेजस्तो कुनै चोटपटक देखिँदैन । पोइजन वा निसासिएर मृत्यु भएको हुनसक्ने अनुमान हामीले गरेका छौं। अनुसन्धानको काम भइरहेको छ,’ घटनास्थलमा पुगेका एक प्रहरी अधिकारीले नेपाल लाइभसँग भने।
झ्याल ढोका सबै लगाएर आगो बालेर सुतेकाले निसासिएर मृत्यु भएको हुन सक्ने प्रहरीले जनाएको छ। बिहान अबेरसम्म पनि मान्छे नउठेपछि स्थानीय गएर बोलाउँदासमेत ढोका खुलेको थिएन। त्यसपछि झ्यालबाट भित्र प्रवेश गरेर हेर्दा मृत र अर्धचेत अवस्थामा भेटिएको स्थानीयले प्रहरीलाई बताएका छन्।
घटनास्थलमा आगो बलेको कोइला र वान्तासमेत भेटिएको उनले बताए । जसकारण पनि हत्या भएको हुननसक्ने प्रहरीले अनुमान गरेको छ। मृत भेटिएकाहरुमा घरधनी ५५ वर्षीया काइली स्याङ्तान, बुहारी २२ वर्षीया शुष्मा स्याङ्तान, ९ वर्षीय नाती आशिष स्याङतान, ५ वर्षीया नातिनी आश्मा स्याङतान घरमै मृत भेटिएका छन्। अर्धचेत अवस्थामा भेटिएका २३ वर्षीय छोरा शुभाव स्याङ्तानको पाटन अस्पतालमा उपचार भइरहेको छ। उनीसँगै उपचारमा पठाइएका उनका २ दिनका काइलीका नातिको मृत्यु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
