काठमाडौं– चर्च ब्वाइज युनाइटेडले सहिद स्मारक ‘बी’ डिभिजन लिगमा लगातार दोस्रो जित हात पारेको छ। सातदोबाटोस्थित एन्फा कम्प्लेक्सको मैदानमा आइतबार सम्पन्न खेलमा चर्च ब्वाइजले खुमलटार युथ क्लबलाई २–० ले पराजित गरेको हो। एकपक्षीय बनेको खेलमा दुवै गोल आशिष चापागाईंले गरे।उनले दुवै गोल दोस्रो हाफमा गरेका थिए।
खेलको ५४औं मिनेटमा आशिष चौधरीको पासमा आशिषले गोल गर्दै चर्च ब्वाइजलाई १–० को अग्रता दिलाए। यस्तै, ७१औं मिनेटमा आशिषले व्यक्तिगत र टोलीका लागि दोस्रो गोल गरे। साइनम लिम्बुको फ्रिकिकमा उनले हेडरमार्फत गर्दै खेल २-० ले जिताए। जारी लिगमा आशिषको यो पाँचौं गोल हो।
यसअघि चर्च ब्वाइजले टुसाल युथ क्लबमाथि ५–२ को जित दर्ता गर्दा आशिषले ह्याट्रिक पूरा गरेका थिए।
यता, खुमलटारको जारी लिगमा यो पहिलो हार बेहोरेको हो। यसअघि खुमलटारले पहिलो खेलमा रानीपोखरी कर्नर टिम (आरसिटी) लाई ३–१ ले पराजित गरेको थियो।
जितसँगै चर्च ब्वाइजले २ खेलबाट ६ अंक जोडेको छ। समान ६ अंक नै रहेपनि श्री भगवती गोलअन्तरमा दोस्रो स्थानमा रहेको छ। यता, पराजित खुमलटारको २ खेलबाट ३ अंक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
