भालुको पित्त र यार्सागुम्बासहित एक जना पक्राउ

सुरक्षा/अपराध

रासस आइतबार, फागुन ८, २०७८ ०९:०१

कञ्चनपुर– भालुको पित्त र यार्सागुम्बासहित प्रहरीले कञ्चनपुरको कृष्णपुर नगरपालिका–१ वनदेवी मन्दिरबाट ५७ वर्षीय बृख कामीलाई शनिबार साँझ पक्राउ गरेको छ।

जिल्ला प्रहरी कार्यालयका प्रहरी निरीक्षक लालबहादुर बमका अनुसार सुदूरपश्चिम प्रदेश प्रहरी कार्यालय धनगढीबाट खटिएको आरआटी टोली र इलाका प्रहरी कार्यालय गुलरियाबाट खटिएको टोलीले जुम्ला कन्काइसुन्दरी गाउँपालिका–६ स्थायी घर भई हाल कैलालीको गोदावरी नगरपालिका–२ अत्तरिया डेरा लिएर बस्ने कामीलाई भालुको पित्त ९२ ग्राम र यार्सागुम्बा ५२४ ग्रामसहित पक्राउ गरेको हो।

उनी बस्दै आएको डेराबाट ५०० ग्राम यार्सागुम्वासमेत फेला पारेको प्रहरी निरीक्षक बमले बताए। पक्राउ परेका कामीमाथि थप अनुसन्धान भइरहेको प्रहरीले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।