काठमाडौं– धरानमा एक पुरुषको हत्या भएको छ। हत्या गरी टाउको, शरीर र खुट्टा अलग–अलग गरी फालिएको अवस्थामा भेटिएको छ। टाउको र खुट्टा जेब्रा झोलामा र शरीरको भाग झाडीमा भेटिएको इलाका प्रहरी कार्यालय धरानका प्रहरी नायब उपरीक्षक (डीएसपी) नरेन्द्र कुवँरले नेपाल लाइभलाई जानकारी दिए।
धरान–भेडेटार सडक खण्डमा पर्ने जंगलमा जेब्रा झोलाभित्र अन्दाजी ४० वर्षभन्दा माथिका पुरुषको टाउको र खुट्टा फेला परेको हो। सडकबाट करिब १०/१२ मिटर तल जेब्रा झोलाभित्र टाउको र खुट्टा फेला परेको प्रहरीले बताएको छ।
स्थानीयवासीले शंकास्पद झोला देखेपछि प्रहरीलाई खबर गरेका थिए। त्यसपछि इलाका प्रहरी कार्यालय धरानबाट खटिएको प्रहरी टोलीले झोलाबाट टाउको र खुट्टा निकालेको हो। ‘टाउको र खुट्टा भेटिएपछि हामीले शरीरको भाग पनि खोजी सुरु गर्यौं। केही पर झाडीमा शरीरको भाग पनि भेटियो’ डीएसपी कुँवरले भने।
कुँवरका अनुसार अन्यत्र कतै हत्या गरेर शव व्यवस्थापन गर्ने क्रममा सो ठाउँमा ल्याएर फालिएको जस्तो देखिएको बताए। शवको प्रकृति हेर्दा करिब एक साता अघि नै ती व्यक्तिको हत्या भएको हुनसक्ने प्रहरीको अनुमान छ। फरेन्सिक विज्ञसहितको टोलीले लाशजाँच मुचुल्का गरी शव उठाएको छ। शव पोस्टमार्टमका लागि पठाइने तयारी प्रहरीले गरेको छ।
उक्त शव कसको हो भन्ने अहिलेसम्म केही खुल्न सकेको छैन। शवको सनाखत गर्नका लागि कोही व्यक्ति हराएको भए आफन्तले प्रहरीसमक्ष सम्पर्क राख्न प्रहरीले अनुरोध गरेको छ।
‘हत्या गरिएको अवस्थामा शव भेटिएको र अहिलेसम्म सनाखत हुन नसकेपछि हामीले मिसिङ फाइल पल्टाउन थालेका छौं। छिमेकी जिल्लामा पनि मान्छे हराएको भन्दै उजुरी परेको भए त्यसको विवरण पनि पठाउन प्रहरी कार्यालयहरूलाई अनुरोध गरिएको छ’ डीएसपी कुँवरले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
