फाइल तस्बिर
काठमाडौं– काठमाडौंमा बागमती नदी किनारमा बसेका 'सुकुम्बासी'को व्यवस्थापनका लागि समिति गठन गरिने भएको छ। अधिकार सम्पन्न बागमती सभ्यता एकीकृत विकास समितिले थापाथली र सिनामङ्गल क्षेत्रको नदी किनारमा अव्यवस्थितरूपमा बसेकालाई हटाउन समिति गठनको तयारी गरेको हो।
सुकुम्बासीका प्रतिनिधिसँगको छलफलमा भएको सहमतिअनुसार नदी किनारको अव्यवस्थित बस्ती हटाउन समिति गठन गर्ने सहमति भएको समितिका सूचना अधिकारी कमल अर्यालले जानकारी दिए। समितिमा सुकुम्बासीका एक जना प्रतिनिधिलाई पनि समावेश गराइने भएको छ।
समितिका सञ्चालक सदस्यको संयोजकत्वमा विज्ञसहितको समिति गठन गरेर समस्या समाधानमा काम गर्ने तयारी भएको छ।
बागमती किनारका सुकुम्बासीलाई व्यवस्थापन गर्न इचङ्गुनारायणमा पाँच वर्षअघि नै सरकारले भवन बनाए पनि सार्न सकेको छैन। बनेका भवन प्रयोगविहीन बनेका छन्। यसअघि समितिले माघ दोस्रो साता सार्वजनिक सूचना प्रकाशन गरी एक हप्ताभित्र बागमतीको गुह्येश्वरीबाट थापाथली पुलसम्म स्वीकृति नलिइ बनेका संरचना हटाउने समय दिएको थियो।
यस क्षेत्रमा समितिको स्वीकृति नलिइ १३ संरचना निर्माण भएको सूचना अधिकारी अर्यालले बताए। त्यसमध्ये एउटा संरचना निर्माणकर्ता पक्षले भत्काएका छन्। बाँकी १२ संरचना निर्माणकर्ताले पनि केही दिनमा आफैँ भत्काउने प्रतिबद्धता जनाएकाले समय दिइएको समितिले जनाएको छ।
स्वीकृति नलिइ बनाएका संरचना भत्काउन समितिले माइकिङमार्फत् समेत जानकारी गराइसकेको छ।
गोकर्णबाट गुह्येश्वरीको नदी किनारमा स्वीकृति नलिइ बनाइएका करिब दुई दर्जन संरचना यसअघि नै समितिले भत्काइसकेको छ।
बागमती किनारको चोभारसम्म स्वीकृति नलिइ बनेका संरचना भत्काएर सौन्दर्य अभिवृद्धि कार्यक्रम अघि बढाइने जनाइएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768391713.png)
-1768388267.png)
-1768388032.png)
-1764146706.png)
-1768288990.png)
