काठमाडौं- चार देशीय टी२० अन्तर्राष्ट्रिय क्रिकेट श्रृङ्खला अन्तर्गत अन्तिम खेलमा आयरल्यान्डसँग नेपाल १६ रनले पराजित भएको छ।
सोमबार भएको खेलमा आयरल्यान्डले दिएको १२८ रनको सामान्य लक्ष्य पछाएको नेपालले निर्धारित २० ओभरमा ९ विकेट गुमाएर १११ रन मात्र बनाउन सक्यो।
नेपालका लागि दीपेन्द्रसिंह ऐेरीले सर्वाधिक २८ रन बनाए। उनले ३० बलमा १ चौका र १ छक्का बनाए। यस्तै, आसिफ शेखले २३ रन बनाउँदा कुशल भुर्तेलले १५ र कमलसिंह ऐरीले १३ रन बनाए।
नेपालका अन्य ब्याटरले भने दोहोरो अंकमा रन बनाउन सकेनन्। नेपालले एक ओभरको अन्तरमा दुई अनुभवी ब्याटर ज्ञानेन्द्र मल्ल र शरद भेषावकरलाई सस्तैमा गुमाएपछि दबाबमा परेको थियो।
शरद १ रनमा एलबीडब्लू आउट भए भने ज्ञानेन्द्र ५ रनमा क्याच आउट भए। यता, कुशल मल्ल ९, लोकेश बम ६ रन बनाए भने सन्दीप लामिछाने १ रनमा आउट भए।
आयरल्यान्डका सिमी सिंह, बारी म्याककार्थी, मार्क एडाएर र एन्डी म्याकब्रिनले दुई/ दुई विकेट लिए भने कर्टिस चाम्फरले एक विकेट लिए।
त्यसअघि ओमान क्रिकेट एकेडेमीमा टस हारेर ब्याटिङ गरेको आयरल्यान्ड २० ओभरमा १२७ रनमा अलआउट भयो।
आयरल्यान्डको तर्फबाट जर्ज डोक्रेलले सर्वाधिक २८ रन बनाए। यस्तै, कर्टिस काम्फर २०, लोर्कन टकर १५, सेन गेटकेट १४ र एन्डी बालबर्नी १९ रनमा आउट भए।
नेपालका लागि दीपेन्द्रले चार विकेट लिए। उनले २१ रन खर्चिए। यो उनको टी२० मा व्यक्तिगत उच्च प्रदर्शन हो।
अभिनास बोहराले दुई विकेट लिँदा सन्दीप लामिछाने, कमलसिंह ऐरी र जितेन्द्र मुखियाले एक/एक विकेट लिए। सन्दीप टी२० अन्तर्राष्ट्रियमा ५० विकेट लिने पहिलो नेपाली बलर बनेका छन्।
नेपालले पहिलो खेलमा ओमानलाई ६ विकेटले पराजित गरेको थियो। यस्तै, दोस्रो खेलमा युएईसँग २५ रनले पराजित भएको थियो। आयरल्यान्डले ओमानलाई ९ विकेटले हराउँदा युएईसँग १३ रनले स्तब्ध बनेको थियो।
अब नेपालले शुक्रबारदेखि ओमानमै हुने टी२० विश्वकप छनोट खेल्नेछ। विश्वकप छनोटको पहिलो खेलमा नेपालले घरेलु टिम ओमानसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772185181.png)
.._ELsE3tlM5D-1772177971.jpg)
-1764146706.png)
