काठमाडौं– मुम्बई इन्डियन्सले पहिले नै जोफ्रा आर्चरलाई हेरिरहेको थियो। तर, फ्रोन्चाइजी मालिक आकाश अम्बानीका अनुसार शनिबार राति मात्रै आर्चरलाई किन्ने निर्णय गरिएको थियो।
मुम्बईले आइतबार आर्चरलाई ८ करोडमा किनेको छ। जसको आधार मूल्य २ करोड रहेको थियो। यद्यपि, कुहिनोको चोटबाट निको भइरहेका आर्चर इन्डियन प्रिमियर लिग (आईपीएल) २०२२ मा उपलब्ध हुने छैनन्।
लिलामीपछि आकाशले भने, ‘हामीले आर्चरको अगाडि पनि धेरै फास्ट बलरमा बोली लगाएका थियौं, तर सफल हुन सकेनौं। त्यसैले शनिबार राति हामीले आर्चरलाई भित्र्याउन बजेट छुट्टाएका थियौं। आर्चरको बारेमा छलफल भएको थियो। तर, शनिबार राति मात्रै पक्का गरेका हौं। उनी यस वर्ष उपलब्ध हुने छैनन्। तर, फिट भएर उनी मैदान फर्किँदा जसप्रित बुमराहसँग घातक जोडी बन्नेछन्।’
मुम्बई इन्डियन्सका क्रिकेट निर्देशक जहिर खानले पनि यही कुरा दोहोर्याए। उनले भने, ‘तपाईंहरु जस्तै म पनि बुमराह र आर्चरको जोडीलाई मैदानमा हेर्न उत्सुक छु। म धेरै खुसी छु हामीले वर्तमान समयका दुई सबैभन्दा घातक फास्ट बलरलाई एकसाथ ल्याएका छौं।’ यसका लागि केही समय पर्खनुपर्ने भए पनि यो प्रतिक्षा जायज रहेको उनको तर्क छ।
चोटका कारण आर्चरले गतवर्ष राजस्थान रोयल्सबाट आईपीएल गुमाएका थिए। २०२० को आईपीएलमा १४ खेलमा २० विकेट लिएका आर्चर ‘मोस्ट भ्यालुवल खेलाडी’ चुनिएका थिए।
राजस्थान आईपीएलमा लिग चरणबाटै बाहिरिए पनि आर्चरले उत्कृष्ट प्रदर्शन गरेका थिए। योर्करका लागि माहिर आर्चर तल्लोक्रममा राम्रो ब्याटिङ पनि गर्ने गर्दछन्।
आर्चरलाई २०१८ को मेगा अक्सनमा राजस्थानले ७ करोड २० लाख भारुमा किनेको थियो। २०१९ मा इंग्ल्याण्डले पहिलो पटक एकदिवसीय विश्वकप उपाधि जित्दा प्रतियोगिताभर र फाइनलमा न्यूजिल्याण्डविरुद्ध सुपर ओभरमा आर्चर नायक बनेका थिए।
आर्चर पछि मुम्बईले सिंगापुरमा जन्मेका अस्ट्रेलियाली ब्याट्सम्यान टिम डेभिडलाई ८ करोड २५ लाखमा किन्यो, जुन विदेशी लिगका लागि उनको सबैभन्दा ठूलो बोली थियो। डेभिडको आधार मूल्य मात्र ४० लाख थियो।
‘हामी विगत तीन वर्षदेखि टिमलाई ट्र्याक गर्दैछौं। उनी विश्वका उत्कृष्ट फिनिशरमध्ये एक हुन्। अहिले हार्दिक पाण्ड्या हाम्रो टोलीमा नभएकाले हामीलाई फिनिसर चाहिएको थियो। त्यो हामीलाई पनि थाहा थियो,’ आकाशले भने। भारतमा हार्दिकजस्तो फिनिशर पाउन सम्भव नभएकाले विदेशी खेलाडीमा रकम खर्च गरेको उनले स्पष्ट पारे।
डेभिड इंग्ल्याण्डमा भएको ‘द हन्ड्रेड’ प्रतियोगिताको दक्षिणी ब्रेभ टोलीमा पनि थिए, जसलाई मुम्बई इन्डियन्सका प्रशिक्षक महेला जयवर्धनाले प्रशिक्षण दिएका थिए। ‘उनी ठूला हिटर हुन्। हामीलाई थाहा थियो हामीसँग पैसा छ र हामी उसलाई लक्षित गर्न सक्छौं। किरण पोलार्ड-डेभिड र बुमराह–आर्चरको जोडी देख्न पाउनु राम्रो हुनेछ,’ उनले थपे।
डेभिडबाहेक मुम्बईले इङ्ग्लिस फास्ट बलर टिमल मिल्सलाई १ करोड ५ लाखमा किनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772185181.png)
.._ELsE3tlM5D-1772177971.jpg)
-1764146706.png)
