काठमाडौं– धारिलो हतियार प्रहार गरी हत्या प्रयास गरेको आरोपमा काठमाडौंबाट एक जना पक्राउ परेका छन्। पक्राउ पर्नेमा सुर्खेतको वीरेन्द्रनगर नगरपालिका–७, का ४८ वर्षीय मिलन खत्री छन्।
उनले नुवाकोटको विदुर नगरपालिका–१, का २२ वर्षीय विकास आचार्यलाई गर्धन र टाउकोमा धारिलो हतियार प्रहार गरी सख्त घाइते बनाएको प्रहरीले जनाएको छ।
प्रहरीका अनुसार उनीहरू दुवैजना ठूलो भर्याङस्थित धर्म राउतले सञ्चालन गरेको फलामको ग्रिल कारखानामा कार्यरत थिए। खत्री र आचार्यबीच गएराति साढे ९ बजेतिर विवाद भएको थियो। मदिरा समेत सेवन गरेका उनीहरूबीच विवाद हुँदा आचार्यले अश्लील गालीगलौज गरेपछि खत्रीले बिँड नभएको फलामको चक्कु र फलामको पत्ता जडान भएको बञ्चरोले आचार्यको गर्धन र टाउकोमा हानेको प्रहरीले जनाएको छ।
धारिलो हतियार प्रहारबाट सख्त घाइते भएका आचार्यलाई उपचारका लागि मनमोहन मेमोरियल अस्पतालमा लगिएकोमा त्यहाँबाट थप उपचारका लागि राष्ट्रिय ट्रमा सेन्टरमा रेफर गरिएको थियो। उनको अहिले ट्रमा सेन्टरमा उपचार चलिरहेको महानगरीय प्रहरी परिसर काठमाडौंका प्रवक्ता, एसपी दिनेश राज मैनालीले बताए।
घटनामा संलग्न रहेको आरोपमा खत्रीलाई महानगरीय प्रहरी बृत्त, स्वयम्भूबाट खटिएको प्रहरीले नियन्त्रणमा लिई ‘ज्यान मार्ने उद्योग’कसूरमा थप अनुसन्धान भइरहेको मैनालीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
