नेपाल-कोरिया सीधा हवाई उडान सञ्चालन गर्न माग

पर्यटन-उड्डयन

रासस सोमबार, माघ २४, २०७८ १९:१८

काठमाडौं- नेपाल कोरिया कल्चर सेन्टरका प्रतिनिधिले संस्कृति, पर्यटन तथा नागरिक उड्डयनमन्त्री प्रेमबहादुर आलेसमक्ष नेपाल एयरलाइन्समार्फत् नेपाल-कोरिया सीधा हवाई उडान सञ्चालन गर्न माग गरेका छन्।

आज मन्त्रालयमा भएको भेटघाटमा नेपाल-कोरिया कल्चर सेन्टर कोरियाका निर्देशक ह्वाङ्क्युले दुवै देशको पर्यटन विकास, कृषि पर्यटनका लागि नेपाल एयरलाइन्सको जहाजमार्फत् सीधा उडान गर्नुपर्ने माग गरे। उनले भने, 'नेपालमा पर्यटन क्षेत्रको विकास र पर्यटक भित्र्याउनका लागि नेपाल-कोरिया सीधा हवाई उडान हुन आवश्यक छ, सरकारको तर्फबाट पहल होस्।'

निर्देशक ह्वाङ्क्युले राखेको प्रस्तावमा मन्त्री आलेले नेपाल-कोरिया सीधा हवाई उडानका लागि आवश्यक छलफल गरिने बताए। उनले भने, 'तपाईंहरूले राख्नुभएको प्रस्ताव राम्रो छ, हामी छलफल गरी खबर गर्छौं।'

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।