काठमाडौं– काठमाडौं उपत्यकाका तीन जिल्ला (काठमाडौं, ललितपुर, भक्तपुर)को सवारी ट्राफिक व्यवस्थापनका लागि टावर निर्माण गरिने भएको छ।
गृहमन्त्रालयले सोमबार गृह प्रशासन सुधार कार्ययोजना सार्वजनिक गर्दै ट्राफिक व्यवस्थापनका लागि टावर निर्माण गरिने बताएको हो। कार्ययोजना सार्वजनिक गर्दै गृहमन्त्री बालकृष्ण खाणले काठमाडौं उपत्यकाका भएको ट्राफिक जाम न्यूनीकरण र व्यवस्थित बनाउन उक्त टावर सहयोग गर्ने बताए।
आधुनिक प्रविधिसहितको टावर निर्माण गरिने र त्यसबाटै काठमाडौं उपत्यकाका सबै ठाउँको ट्राफिक अनुगमन गरिने छ। सीसी टिभीमार्फ उक्त टावरबाटै अनुगमन गर्ने र नियम विपरीत सवारी चलाउनेलाई कारबाहीको दायरामा ल्याइनेछ।
जसकारण उपत्यकाका ट्राफिक व्यवस्थापन थप प्रभावकारी हुने गृहप्रवक्ता फणिन्द्रमणि पोखरेलले बताए। टावर निर्माणको काम तीन वर्षभित्र सम्मपन्न गरिने गृहले जनाएको छ।
योसँगै राष्ट्रिय राजमार्गहरु, मुख्य व्यापारिक केन्द्र तथा पर्यटकीय क्षेत्रहरुमा आवश्यकता अनुसार सीसीटिभी जडान, सीसीटिभी कन्ट्रोल रुम तथा प्राभेन्सियल रेकर्डिङ सिस्टमको स्थापना गरिने गृहले आफ्नो कार्ययोजनामा उल्लेख गरेको छ।
उक्त कन्ट्रोल रुम तथा प्राभेन्सियल रेकर्डिङ सिस्टम भने प्रदेश ट्राफिक प्रहरी कार्यालयमा राखिनेछ। यसले राष्ट्रिय राजमार्गको ट्राफिक व्यवस्थापनमा सुधार गर्नुका साथै दुर्घटना न्यूनीकरण गर्न सहयोग गर्ने, दुर्घटनाको अनुसन्धानमा सहजता हुने, सवारी आवतजावतको व्यवस्थित अभिलेखिकरण हुने, पर्यटकीय क्षेत्रहरु थप सुरक्षित हुने बताइएको छ। एक वर्षभित्रमा यो काम सम्पन्न गर्ने लक्ष्य गृहको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
