काठमाडौं- मुलुकका विभिन्न जिल्लामा भएका सवारी दुर्घटनामा शनिबार १६ जनाको मृत्यु भएको प्रहरी प्रधान कार्यालयले जनाएको छ।
प्रहरीका अनुसार प्युठान, सुनसरी, सिरहा, रुपन्देही, स्याङजा र धादिङमा भएका छुट्टाछुट्टै दुर्घटनामा उनीहरूको ज्यान गएको हो। प्युठानको गौमुखी गाउँपालिका-६ ओखरपाटा भन्ने स्थानमा विवाहको दुलही लिएर फर्कँदै गरेको ग १ ज ५०९२ नम्बरको जिप सडकबाट १५० मिटर तल खसेर आज बिहान भएको दुर्घटनामा आठ जनाको मृत्यु भएको छ।
प्रहरीका अनुसार ६ जनाको घटनास्थलमै र दुई जनाको जिल्ला अस्पतालमा उपचारको क्रममा मृत्यु भएको हो। दुर्घटनाका पाँच घाइते भएकामध्ये दुई जनाको जिल्ला अस्पतालमा उपचार भइरहेको र र तीनजनालाई थप उपचारको लागि बुटवल पठाइएको छ।
यता सुनसरीको भोक्राहा नरसिंह गाउँपालिका-३ खुनिया पुलस्थित सडकमा ना ८ ख ८४९३ नम्बरको बस र ना २ ख २९९६ नम्बरको ट्रक गएराति एकआपसमा ठक्कर खाइ दुर्घटना हुँदा तीनजनाको मृत्यु भएको छ। उक्त दुर्घटनापश्चात् आगलागी भएको र त्यसमा परेर उनीहरूको मुत्यु भएको प्रहरीले जनाएको छ। दुर्घटनामा घाइते भएका २७ जनाको सुनसरी र विराटनगरको विभिन्न अस्पतालमा उपचार भइरहेको छ।
यस्तै सिरहाको गोलबजार नगरपालिका-४ स्थित सडकमा ना १ ज ५९१२ नम्बरको गाडीको ठक्करबाट मिर्चैया नगरपालिका-६ बस्ने ४५ वर्षीय ब्रह्मदेव ठाकुरको मृत्यु भएको छ। रुपन्देही, तिलोत्तमा नगरपालिका-९ स्थित सडकमा लु ३७ प ६३५१ नम्बरको स्कुटर आफैं अनियन्त्रित भइ दुर्घटना हुँदा स्कुटर चालक सोही नगरपालिका-१५ कोटिहवा बस्ने २४ वर्षीय सुशान्त बस्यालको मृत्यु भएको छ।
स्याङजा, विरुवा गाउँपालिका-३ धोवादीस्थित भित्री सडकमा ग १ ज ५९३९ नम्बरको जिप सडकदेखि अन्दाजी ५०० मिटर तल खसेर आज दुर्घटना हुँदा दुई जनाको घटनास्थलमै मृत्यु भएको प्रहरीले जनाएको छ।
यस्तै धादिङको धुनिवेशी नगरपालिका-१ बन्चरेस्थित सडकमा प्र ३-०१-००३ क ७२५५ नम्बरको जेसीबी आफैँ अनियन्त्रित भइ सडकबाट अन्दाजी ४० मिटर तल खोल्सामा खसेर भएको दुर्घटनामा पहिचान नखुलेका एक व्यक्तिको मृत्यु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
