काठमाडौं- नेपाल पुलिस क्लब र च्यासल युवा क्लबबीच शनिबार हुने भनिएको खेल पुन: सारिएको छ।
अखिल नेपाल फुटबल संघ (एन्फा)ले सहिद स्मारक ए डिभिजन लिगको नवौं चरणमा कोरोना संक्रमणका कारण स्थगित भएको खेल मैदानको अवस्था देखाउँदै पुन: सारेको हो।
कोरोनाका कारण स्थगित भएको पुलिस र च्यासलबीचको खेल माघ २२ गते शनिबार हुने जानकारी गराएको थियो। तर, अफ्रिकी राष्ट्र मरिससविरूद्वको दुई मैत्रीपूर्ण खेल पश्चात् मैदानको अवस्था सुधार गर्नुपर्ने भएकोले खेल पुन: सारिएको एन्फाले जनाएको छ।
अब यी दुईबीचको खेल माघ २६ गते बुधबार दिउँसो १ बजे त्रिपुरेश्वरस्थित दशरथ रंगशालामा हुनेछ।
यसअघि यो खेल माघ २ गतेका लागि तय भएको थियो। तर, मनाङ मर्स्याङ्दी क्लबको घरेलु मैदान पोखरामा खेलेर काठमाडौं फर्किएपछि च्यासलका १९ जना खेलाडीमा कोरोना संक्रमण पुष्टि भएको थियो।
मैदान उत्रिने खेलाडीको अभाव भएपछि अन्तिम समयमा एन्फाले खेल स्थगित गर्ने निर्णय गरेको थियो। पुलिस र च्यासल दुवै टोलीले जारी लिगमा सन्तोषजनक प्रदर्शन गर्न सकेका छैनन्।
पुलिस ८ खेलबाट ७ अंक जोडेर ११औं स्थानमा रहेको छ। पुलिसले १ खेलमा जित, ४ मा बराबरी र ३ मा हारको नतिजा निकालेको छ।
यता, ८ खेलबाट ५ अंक जोडेको च्यासल रेलिगेसन जोनमा छ। च्यासल १३औं स्थानमा रहेको छ। च्यासलले १ जित, २ बराबरी र ५ हारको नतिजा निकालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
