काठमाडौं- आहा रारा गोल्डकपको २०औं संस्करणको उपाधि सशस्त्र प्रहरीको एपीएफ फुटबल क्लवले जितेको छ।
शनिबार पोखरा रंगशालामा भएको फाइनल खेलमा पेनाल्टीमार्फत् मनाङ मर्स्याड्दी क्लवलाई ५-४ गोलले पराजित गर्दै एपीएफले उपाधि जितेको हो।
निर्धारित ९० मिनेट र थप ३० मिनेटको खेलमा दुवै टोलीले दुई-दुई गोलको बराबरी खेलेपछि पेनाल्टी सुटआउटबाट विजेता छनोट गरिएको हो।
आहा रारामा १४ वर्षपछि फाइनलमा स्थान बनाएको एपीएफले च्याम्पियन बन्दै १० लाख एक हजार रुपैयाँ पुरस्कार र ट्रफी हात पार्न सफल हुँदा उपविजेता मनाङले पाँच लाख एक हजार रुपैयाँमा चित्त बुझाउन बाध्य बन्यो। हालसम्म उपाधि जित्न नसकेको विभागीय टोली एपीएफले उपाधि उचालेसँगै आहा राराले नयाँ च्याम्पियन पाएको छ।
खेलको निर्धारित र अतिरिक्त ३० मिनेटको खेल दुई गोलको बराबरीमा सकिएपछि टाइब्रेकरबाट खेलको निर्णय गरिएकामा एपीएफ टाइब्रेकरमा भाग्यमानी भयो। एपीएफको जितमा गोलकिपर युया कोरियामा नायक बने। पेनाल्टी सुटआउटमा मनाङका ओलावाले अफिजको प्रहारलाई रोक्दै कोरियामाले एपीएफलाई पहिलोपटक च्याम्पियन बनाउँदै ऐतिहासिक सफलता दिलाए।
टाइब्रेकरमा एपीएफका नवीन लामा, सनिष श्रेष्ठ, रवि थिङ, मणि लामा र अर्मान्ड बिडोमले गोल गर्न सफल भए। मनाङका फ्रेङलिन, दयानन्द सिंह, शिव गुरुङ र रुपेश केसीले मात्र गोल गरे। खेलको २१औँ मिनेटमा एपीएफका युवराज खड्काले गोल गर्दै अग्रता बनाएका थिए। पहिलो हाफमा १-० ले पछि परेको मनाङले दोस्रो हाफमा खेलको ६७औँ मिनेटमा दयानन्द सिंहको गोलमार्फत खेल बराबरीमा ल्याउन सफल भयो।
खेलको ८४औँ मिनेटमा फ्रेङलिनको गोलमार्फत् मनाङले अग्रता बनाएर विजय नजिक पुगेको अवस्थामा पाँच मिनेटको इन्ज्यूरी समयको पहिलो मिनेटमा एपीएफका रवि थिङले गोल गर्दै खेललाई अतिरिक्त समयमा लैजान सफल भएका थिए। अतिरिक्त समयमा दुवै टोलीबाट कुनै पनि गोल हुनसकेको थिएन।
‘क्याराभान गोल्डकप’ सहित १२औँ पटक फाइनल खेलेको मनाङलाई दुईपटक मात्र फाइनल पुगेको एपीएफले स्तब्ध बनाउँदै उपाधि जित्न सफल भएको हो। एपीएफ १४ वर्षपछि दोस्रोपटक फाइनल पुगेको हो। २०६४ मा छैटौँ संस्करणमा पहिलोपटक फाइनल पुगेको एपीएफ नेपाल पुलिस क्लबसँग २-० ले पराजित भएको थियो।
मनाङले भने २०६० को दोस्रो, २०६१ मा तेस्रो, २०६८ को दशौँ, २०७२ मा चौधौँ, २०७३ को पन्धौँ र २०७६ को १८औँ संस्करणको उपाधि जितेको थियो। प्रतियोगिताको सर्वोत्कृष्ट खेलाडीको उपाधि एपीएफका डिफेण्डर राजन गुरुङले प्राप्त गरे। उनले पुरस्कारबापत एक थान स्कुटर हात पारे।
यसैगरी उत्कृष्ट गोलकिपर एपीएफका युया कोरियाम, डिफेण्डर एपीएफका राजन गुरुङ, मिडफिल्डर एपीएफकै रवि थिङ, फरवार्ड मनाङका ओलावाले अफिज, उत्कृष्ट प्रशिक्षक एपीएफका कुमार थापा, सर्वाधिक गोलकर्ता एपीएफका रवि थिङ घोषित हुँदै जनही २५-२५ हजार रुपैयाँका दरले पुरस्कार पाए। प्रतियोगितामा नेपालका ए डिभिजनका आठ क्लब, विदेशी एक र आयोजक सहारा गरी १० टोलीले सहभागिता जनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787795595.png)
-1786602170.png)
-1786513116.png)
