काठमाडौं- गृहमन्त्री बालकृष्ण खाणले विपद्को क्षेत्रमा अझै सचेत र सजग भइ केन्द्रीकृत भएर लाग्न नसकेको बताएका छन्।
शुक्रबार गृह मन्त्रालयमा बसेको राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी समितिको बैठकमा मन्त्री खाणले यस्तो बताएका हुन्।
उनले नेपालको भू-वनोटका कारण जुनकुनै बेलामा पनि विपद्का घटनाहरु हुनसक्ने भन्दै त्यसबारे पूर्वतयारी र विश्लेषण गरेर अघि बढ्न आवश्यक रहेको बताए। विपद् व्यवस्थापनको क्षेत्रमा अझै पनि सजगता र केन्द्रीकृत भएर लाग्न नसकेको तथा बजेट पनि भनेजस्तो व्यवस्थापन हुन नसकेको उनको भनाइ थियो।
‘खास गरेर पहिरो र बाढीको जोखिम धेरै छ। हाम्रो जुन खालको भू-वनावट छ, भूगर्भको अवस्था छ, साना ठूला धेरै नदीहरु छन्, पानीका स्रोतहरु धेरै छन्, जसकारण जुनकुनै बेला पनि विपद्का घटना हुन सक्छन्,' उनले भने, 'त्यसकारण विपद्पूर्व नै त्यसको विश्लेषण गर्न जरुरी छ। विपद्पछिको बारेमा हामी धेरै सजग र सचेत हुन थालेका छौँ, तर विपद्लाई नै आउन दिनुभन्दा अगाडि नै पूर्वरोकथाम गर्ने भन्ने बारेमा अझै हाम्रो सजगता र केन्द्रीकृत शक्ति लाग्न सकेको छैन।’
संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठले विपद्पूर्व नै पूर्वसूचना प्रणालीको व्यवस्था गरिनुपर्ने बताए। उनले जनतालाई विपद्बाट जोगाउनका लागि चेतावनीस्वरुप सूचना प्रकाशन गर्दा त्यसले मानवीय र भौतिक क्षति हुनबाट जोगाउन सकिने बताए। मन्त्री श्रेष्ठले संघीय राज्य व्यवस्था भइसकेपछि हरेक काममा तीन तहको समन्वय आवश्यक पर्ने र स्थानीय तहलाई बजेटदेखि लिएर सबै क्षेत्रमा प्रभावकारी बनाउन सके स्थानीय सरकारले धेरै काम गर्ने धारणा राखे।
सहरी विकासमन्त्री रामकुमारी झाँक्रीले अव्यवस्थित रुपमा राखेका सुकुम्बासीहरुलाई सरकारले जगगा उपलब्ध गराउनेभन्दा पनि आवास बनाउनुपर्ने बताइन्। उनले सरकार संविधानमा सुकुम्बासी, जोखिम बस्ती र विपद् परेका व्यक्तिहरुरुलाई जग्गा वा आवास दुईमध्ये एकमा स्पष्ट हुन आवश्यक रहेको बताए।
मन्त्री झाँक्रीले सरकारले जोखिममा परेकाहरुलाई जग्गा किनेर उपलब्ध गराउन सक्ने स्थितिमा नरहेको भन्दै विपद्मा परेका वा जोखिमका बस्तीलाई जग्गा छोडेर आवास उपलब्ध गराउनेतर्फ लाग्नुपर्ने बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787755120.jpg)
-1786602170.png)
-1786513116.png)
