काठमाडौं- राष्ट्रिय फुटबल टोलीका कप्तान किरण चेम्जोङले मरिससविरुद्ध खेल अनुभव बटुल्ने अवसर भएको बताएका छन्।
एसिया कप छनोटको तयारीमा रहेको नेपाली राष्ट्रिय टोलीले पश्चिम अफ्रिकी देश मरिसससँग दशरथ रंगशालामा खेल्ने तय भएको दुईमध्ये पहिलो अन्तर्राष्ट्रिय मैत्रीपूर्ण खेल शनिबार हुँदैछ।
प्रतियोगिता अघि आयोजित ‘प्रि म्याच कन्फ्रेन्स’मा बोल्दै चेम्जोङले मरिसविरुद्धको खेललाई केही कुरा सिक्ने र अनुभव बटुल्ने अवसरको रुपमा लिएको बताए।
‘मैत्रीपूर्ण खेल हो, भनेर जे पनि गर्न मिल्दैन। रिजल्टको अपेक्षा हुन्छ,’ उनले भने, ‘जितकै लागि खेल्छौं। यो खेल केही कुरा सिक्ने र अनुभव बटुल्ने अवसर हो।’
माल्दिभ्समा व्यवासायिक फुटबल खेलिरहेका किरण मरिससविरुद्धको दुई मैत्रीपूर्ण खेलका लागि बुधबार स्वदेश फर्किएका थिए।
मुख्य प्रशिक्षक अब्दुल्लाह अलमुताइरीले दुई मैत्रीपूर्ण खेलका लागि दुई अलगअलग टोलीको घोषणा बुधबार नै गरेका थिए। किरणसहित १२ खेलाडी दुवै टोलीमा छन्।
उनले टोलीसँग प्रशिक्षण गरेको दुई दिन भएपनि सबै खेलाडी फिट रहेको बताए।
‘भर्खर मात्र टिम जोईन गरेको दुई दिन भयो। खेलाडी ब्रेकमा नेशनल टिममा आउनुभएको छ। सबै खेलाडी फिट देखेको छु। दुई दिन ट्रेनिङ राम्रो भयो,‘उनले भने,‘ पहिलोपटक मरिसससँग खेल्दैछौं। तर, भोलीका लागि तयार छौं।’
यता, नेपाली राष्ट्रिय फुटबल टोलीका सहायक प्रशिक्षक किरण श्रेष्ठले मारिससविरुद्धको खेल एसिया कप छनोटको तयारीको लागि लिएको बताए।
‘मरिसस र नेपाल उस्तै लेभलको टोली हो। वरियता उस्तै जस्तो छ। शारीरिक रुपमा अलि बलिया छन्। उही दाँजोको टोली हो। तर, एसिया कपको तयारी लागि खेल्ने भएको कारण सुधारिएको प्रदर्शन गर्नेछौं,’ उनले भने। मरिसस फिफा वरीयतामा १७२ र नेपालको १६९ छ ।
मुख्य प्रशिक्षक अबदुल्ला अल्मुताइरी भने ‘प्रि म्याच कन्फ्रेन्स’मा उपस्थित भएनन्।
सञ्चारकर्मीहरुले मुख्य प्रशिक्षक अल्मुताइरीको अनुपस्थितिबारे प्रश्न गर्दा उनले भने, ‘मलाई उपस्थित भइदिनु भनेको भएर आएको हुँ। सायद उहाँ थाक्नु भएको छ।’
यता, मरिससमा प्रशिक्षक टोनी फ्रान्कोइसले धेरैपछि अन्तर्राष्ट्रिय खेल खेल्न लागेको बताउँदै राम्रो प्रदर्शन गर्ने बताए।
‘४५ दिनको मात्र तयारी गरेका छौं। हाम्रो चार खेलाडी कोरोना संक्रमित भएर आइसोलेशनमा हुँदा अलिक फरक पर्छ। तर, नेपालविरुद्ध राम्रो प्रदर्शन गर्ने प्रयास गर्ने छौं,’ उनले भने।
गत असोजमा माल्दिभ्समा सम्पन्न साफ च्याम्पियनसिपको उपविजेता नेपाली टोलीले आगामी जुन महिनामा एसिया कप छनोटको तेस्रो चरण खेल्दैछ। त्यसको तयारीस्वरुप अखिल नेपाल फुटबल संघ (एन्फा)ले ‘ए’ डिभिजन लिगलाई बीचमै रोकेर दुई मैत्रिपूर्ण खेल आयोजना गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
