काठमाडौं- साविकको ‘ए’ डिभिजन लिग च्याम्पियन मछिन्द्र फुटबल क्लबलाई स्तब्ध पार्दै विभागीय नेपाल एपीएफ फुटबल क्लब २०औं आहा रारा गोल्डकपको फाइनलमा प्रवेश गरेको छ।
पोखरा रंगशालामा बुधबार सम्पन्न खेलमा १० खेलाडीमा समेटिएको मछिन्द्रलाई ३–१ ले पराजित गर्दै एपीएफ दोस्रो पटक फाइनलमा पुग्न सफल भएको हो।
एपीएफलाई करिब १४ वर्षपछि फाइनलमा पुर्याउन सनिश श्रेष्ठ, प्रदीप लामा र नविन लामाले गोल गरे। मछिन्द्रका लागि एक मात्रै गोल ओमोलाजा नुरेन करिमले गरेका थिए।
सुरुआदेखि नै प्रतिस्पर्धात्मक बनेको खेलको २५औं मिनेटमा सनिसले गोल गर्दै एपीएफलाई सुरुआती अग्रता दिलाए। छिरिङ गुरुङले मणि लामालाई फउल गरेपछि उनैले झन्डै ३० यार्ड टाढाबाट गरेको फ्रिकिक प्रहारलाई सनिशले हेडरमार्फत् गोल गरे।
४०औं मिनेटमा करिमले गोल गर्दै खेललाई १–१ गोलको बराबरीमा ल्याए। सविन थापाले मेसुके ओलुमोउलाई फउल गरेपछि झन्डै ३० यार्डबार्ट कप्तान रेजिन धिमालको फ्रिकिकलाई अनमार्क रहेका करिमले हेडमार्फत् गोल गरे।
७७औं मिनेटमा प्रदीपले गोल गर्दै एपीएफलाई २–१ को अग्रता दिलाए। कप्तान नविनको क्रसमा गोलरक्षक अघि बढेको अवस्थामा प्रदीपले गोल गरे। ७१औं मिनेटमा मछिन्द्र १० खेलाडीमा समेटिन पुग्यो। करिनले रेफ्रीसँग विवाद गर्न गरे रेफ्री नविन्द्र महर्जनले दोहोरो पहेलो कार्ड देखाउँदै मैदान बाहिर पठाए।
इन्ज्युरी समयको सातौं मिनेटमा कप्तान नविनले गोल गर्दै एपीएफको जित सुनिश्चित गरे। आवास लामिछानेको प्रहारलाई गोलरक्षकले विफल पारेपनि रिबाउन्डमा नविनले खाली पोस्टमा सहजै गोल गरेका थिए। अब एपीएफले उपाधिको लागि आर्मी र मनाङबीचको विजेतासँग खेल्नेछ। दोस्रो सेमिफाइनल बिहीबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_PJ3Pux3W9j-1771414611.jpg)
-1764146706.png)
