काठमाडौं- नेकपा (माओवादी केन्द्र)ले केन्द्रीय पदाधिकारीसहित स्थायी समिति, पोलिटब्यूरो र बाँकी रहेका केन्द्रीय समितिसमेत एकै पटक टुंगो लगाउने तयारी गरेको छ। पार्टी नेता वर्षमान पुन र ओनसरी घर्ती आगामी सोमबार स्वदेश फर्किने भएकाले पदाधिकारीसहित स्थायी र पोलिटब्यूरो एकै पटक टुंग्याउने सहमतिको तयारी थालिएको हो।
कोरोना संक्रमणको अवस्थामा सबै नेताहरुको परामर्शमा पार्टीका सम्पूर्ण बाँकी काम टुंगो लगाइने नेता गिरिराजमणि पोखरेलले बताए। ‘पार्टी पदाधिकारी, स्थायी समिति, पोलिटब्यूरो र बाँकी रहेको केन्द्रीय समिति छिट्टै टुंगो लाग्छ। त्यसका लागि गृहकार्य भइरहेको छ,’ पोखरेलले भने, ‘पार्टीमा सहमति गरेर एक मुष्ट टुंगो लगान्छ। यदि, चुनावबाट गर्नुपर्ने भएमा कोरोना संक्रमण कम भएलगतै टुंगो लगाउँछौ।’
तत्काल कोरोना संक्रमणको जोखिम भएकाले 'भर्चुअल' माध्यममार्फत् छिट्टै केन्द्रीय समिति बैठक बस्ने पोखरेलले बताए। यस्तै बाँकी रहेका प्रदेश समितिलाई समेत तत्काल टुंगो लगाउन शनिबार बसेको स्थायी समितिले निर्देशन दिइसकेको छ। प्रदेश समिति सके सर्वसम्मत नभए चुनावी प्रक्रियाबाट भए पनि टुंगो लगाउन बैठकले निर्देशन दिएको छ।
पार्टी अध्यक्षमा पुष्पकमल दाहाल‘प्रचण्ड’सर्वसम्मत चयन भइसकेका छन्। अरु वरिष्ठ उपाध्यक्षसहित १५ पदाधिकारी, स्थायी समिति र पोलिटब्यूरो तथा बाँकी केन्द्रीय समिति एकै चरणमा टुंग्याउने तयारी गरिएको हो। वरिष्ठ उपाध्यक्ष नारायणकाजी श्रेष्ठलाई बनाउने सम्भावना छ। तर, अध्यक्षपछिको सबैभन्दा शक्तिशाली मानिने महासचिवमा धेरै नेताहरुले आकांक्षा राखेका छन्। जसमा वर्षमान पुन, जनार्दन शर्मा, पम्फा भुसाल, देव गुरुङ, शक्तिबहादुर बस्नेत र गिरिराजमणि पोखरेललगायत नेताहरु प्रतिस्पर्स्धामा छन्। उनीहरुमध्ये सबैभन्दा जब्बर दाबेदार पुन र शर्मा नै हुन्। यी दुई नेताबीच चर्को प्रतिस्पर्धा भएमा दुवैलाई उपमहासचिव पदमा व्यवस्थापन गरेर तेस्रो नेता महासचिव हुनसक्ने एक नेताको दाबी छ। त्यस्तो अवस्थामा गुरुङ, भुसाल, बस्नेत र पोखरेलमध्येबाटै एक जना महासचिव बन्ने एक नेता बताउँछन्। अन्य पदमा नेता व्यवस्थापन गर्न खासै गाह्रो हुने ती नेताको दाबी छ।
यस्तै स्थायी समितिमा यसअघिका धेरै नेताहरु दाहोरिने सम्भावना देखिएको छ। अरु केन्द्रीय समितिमा लामो समय काम गरेका नेताहरु स्थायी समितिमा पर्ने छन्। केन्द्रीय समिति ३०१ जनाको बनाउने भनिएको छ। त्यसमा थप १५ प्रतिशत अध्यक्षबाट मनोनीतमा पर्ने छन्। त्यसो हुँदा केन्द्रीय समिति कूल ३४५ जना हुने छन्। यसअघि हलबाट २३६ जना चयन भइसकेका छन्। अरु ६५ जना सबै समुदायको समेट्नगरी केन्द्रीय समितिमा समेटिने छन्। यस्तै अरु १५ प्रतिशत अध्यक्षले मनोनीत गर्ने छ। त्यसबाट ११५ जनाको पोलिटब्यूरो हुने भएको छ। त्यसलाई समेत समेटेर एकमुष्ट नाम टुंगो लगाउने तयारीमा अध्यक्ष प्रचण्ड जुटेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
