काठमाडौं– आर्सनललाई पराजित गर्दै लिभरपुल इंग्लिस फुटबल लिग (इएफएल) कप अर्थात् कारवाओ कपको फाइनलमा प्रवेश गरेको छ।
सेमिफाइनलको दोस्रो लेगमा आर्सनललाई २–० ले पराजित गर्दै लिभरपुल फाइनलमा पुगेको हो।यी दुईबीचको पहिलो लेग गोलरहित बराबरीमा सकिएको थियो। समग्रमा २–०को जित निकाल्दै लिभरपुलले चेल्सीसँगको भेट पक्का गरेको हो।
मुख्य फरवार्डद्धय साडियो माने र मोहम्मद सलाहविना खेलिरहेको लिभरपुलका लागि दोस्रो लेगको जितमा दुवै गोल पोर्चुगिज फरवार्ड डिएगो जोटाले गरे। उनले पहिलो र दोस्रो हाफमा समान एक गोल गरेका थिए।
इमिरेट्स स्टेडियममा बिहीबार राति भएको खेलको १९औं मिनेटमा जोटाले गोल गर्दै लिभरपुललाई अग्रता दिलाए। उनले ट्रेन्ट एलेक्सान्डर आर्नाेल्डको पासमा गोल गरेका थिए।
खेलको ७७औं मिनेटमा आर्नाेल्डकै पासमा जोटाले व्यक्तिगत र टोलीका लागि दोस्रो गोल गर्दै लिभरपुललाई फाइनलमा पुर्याए।
लिभरपुलले उपाधिका लागि २७ फेब्रुअरीमा चेल्सीसँग खेल्नेछ। चेल्सी टोटेनहमलाई समग्रमा ३–० ले पराजित गर्दै यसअघि नै फाइनलमा पुगिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
