फाइल तस्बिर
काठमाडौं- आजबाट राष्ट्रिय फुटबल टिमको प्रशिक्षण सुरु भएको छ। अखिल नेपाल फुटबल संघ (एन्फा)को खेल मैदान सातदोबाटोमा प्रशिक्षण सुरु भएको हो।
मुख्य प्रशिक्षक अब्दुल्लाह अल्मुताइरीले पहिलो चरणमा ३५ खेलाडीलाई बन्द प्रशिक्षणमा बोलाए पनि २८ जना मात्र उपस्थित भएका थिए। फिफा विन्डोमा हुने मैत्रीपूर्ण खेलका लागि नेपाली राष्ट्रिय फुटबल टिमले आजबाट प्रशिक्षण सुरु गरेको छ।
मुख्य प्रशिक्षक अल्मुताइरीको प्रशिक्षणमा रहेको क्याम्पमा पहिलो चरणमा ३५ खेलाडीलाई बन्द प्रशिक्षणमा बोलाएकोमा सबै खेलाडी भने उपस्थित हुन सकेनन्। फिफा विन्डोमा नेपालले मोरिसससँग दुईवटा मैत्रीपूर्ण खेल खेल्नेछ। सोही खेलका लागि खेलाडीहरुलाई बन्द प्रशिक्षणमा बोलाइएको हो।
नेपाल र मोरिससबीच दशरथ रंगशालामा माघ १५ र १८ गते दुई मैत्रीपूर्ण खेल हुने तालिका रहेको छ। काठमाडौंमा नै जारी रहेको ए डिभिजन लिगको नवौं चरण सोमबार सकिएको छ। राष्ट्रिय टिमको बन्द प्रशिक्षणका लागि छानिएका र जारी लिगमा विभिन्न क्लवमा आबद्ध भएर खेलिरहेका खेलाडीहरु पनि बन्द प्रशिक्षणमा पुगेका छन्।
मुख्य प्रशिक्षक अल्मुताइरीले सहायक प्रशिक्षकका रुपमा संकटा क्लवका मुख्य प्रशिक्षक विष्णु गुरुङलाई बोलाएका छन्। अल्मुताइरीले मोरिससविरुद्धको दुई मैत्रीपूर्ण खेलका लागि उनलाई दोस्रो सहायक प्रशिक्षकका रुपमा टिममा बोलाएका हुन्।
एन्फा कम्प्लेक्स सातदोबाटोमा पत्रकारहरुसँग कुरा गर्दै मुख्य प्रशिक्षक अल्मुताइरीले मोरिससविरुद्ध खेल्न तयारी अवस्थामा रहेको प्रतिक्रिया दिए। उक्त खेलमा केही नयाँ खेलाडीलाई मौका दिइने उनको भनाइ थियो।
यस्तै सहायक प्रशिक्षकको रुपमा जिम्मेवारी पाएका गुरुङले आफूले पाएको मौकाको भरपुर सदुपयोग गरेर आफू र खेललाई अझ निखार्ने बताए। यो पटकको प्रशिक्षणमा चोटबाट मुक्त भएर फर्किएका विमल घर्ती मगरसँगै लामो समयदेखि अस्ट्रेलियामा रहेका जगजित श्रेष्ठले पनि 'कमब्याक' गरेका छन्। जसमा जगजितले राष्ट्रिय टिममा फर्किने अन्तिम अवसर हुन सक्ने बताएका छन्।
यद्यपि, नेपालमा बढ्दै गएको कोभिड संक्रमणका कारण यो खेल हुने/नहुने अनिश्चित छ। सरकारले जारी गरेको निषेधाज्ञा र बढ्दो संक्रमणको जोखिमबीच खेल खेलाउनु आफैंमा जोखिम हुने देखिन्छ।
मंगलबारबाट प्रशिक्षण सुरु गरे पनि कोरोना संक्रमण भएका खेलाडीहरु निको भएर आएपछि सम्पूर्ण टिमको प्रशिक्षण गर्ने एन्फाको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
