काठमाडौं– शीर्षस्थानको मछिन्द्र फुटबल क्लबले सहिद स्मारक ‘ए’ डिभिजन लिगमा रेलिगेशनको चोटबाट फर्किएको ब्रिगेड ब्वाइज क्लब (बीबीसी)माथि सानदार जित हात पारेको छ।
त्रिपुरेश्वरस्थित दशरथ रंगशालामा आइतबार भएको खेलमा मछिन्द्रले बीबीसीलाई ४–० ले पराजित गरेको हो।
जितसँगै मछिन्द्रले शीर्षस्थानमा ४ अंकको स्पष्ट अग्रता बनाएको छ। मछिन्द्रको ९ खेलबाट २३ अंक छ भने समान खेलबाट १९ अंक जोडेको मनाङ मर्स्याङ्दी दोस्रो स्थानमा छ।
आइतबारको खेलमा मछिन्द्रका बिमल घर्तीमगरले दुई तथा रेजित सुब्बा र अभिषेक रिजालले समान एक–एक गोल थपे।
लिगमा सबैमाथि हाबी भएको मछिन्द्रलाई पहिलो हाफमा बराबरीमा रोके पनि बीबीसीले दोस्रो हाफमा रोक्न सकेन।
खेलको १५औं मिनेटमा रजिन धिमालकै कर्नरमा देवेन्द्र तामाङको हेडर पोस्ट नजिकैबाट आकासिँदा मछिन्द्रले अग्रता लिन चुक्यो।
२२औं मिनेटमा छिरिङ गुरुङको क्रसमा बिमल घर्तीमगरको हेडरले फ्रेमको दिशा लिन सकेन।
२५औं मिनेटमा रजिन धिमालको कर्नरमा देवेन्द्र तामाङ प्रहार गोलरक्षक गुरप्रित सिंहले बचाए। उक्त बललाई डिफेन्डरले क्लियर गर्दै बिबिसीको संकट टारे।
४१औं मिनेटमा रोशन रानामगरको प्रहारलाई गोलरक्षक विशाल श्रेष्ठले दोस्रो प्रयासमा नियन्त्रणमा लिए। ४४औं मिनेटमा सुनिल बलको करिब ३० यार्ड टाढाको प्रहार गोलरक्षक गुरप्रित सिंहले पञ्च गरे।
दोस्रो हाफमा फरवार्ड र मिडफिल्डरले राम्रो तालमेल मिलाउँदा मछिन्द्रले ४ गोल गर्यो।
५६औं मिनेटमा बीबीसीका गोलरक्षक गुरप्रित सिंहको कमजोर प्रयासको फाइदा उठाउँदै बिमलले मछिन्द्रलाई अग्रता दिलाए।
छिरिङ गुरुङको प्रहारलाई गोलरक्षक सिंहले बचाउन अघि बढेको अवस्थामा गरेको क्रसलाई रेजिन सुब्बाको ओभरहेड किकलाई बिमलले हेडमार्फत् गोल गरे।
६२औं मिनेटमा बिमलले व्यक्तिगत दोस्रो गोल गर्दै मछिन्द्रको अग्रता दोब्बर पारे। रजिन धिमालको लामो पासलाई बिमलले वान भर्सेस वानको अवस्थामा सहज गोल गरे। जारी लिगमा बिमलको यो तेस्रो गोल हो।
६६औं मिनेटमा बिमलको प्रहारलाई गोलरक्षक सिंहले पञ्च गर्दै बचाउँदा ह्याट्रिकबाट चुके।
७६औं मिनेटमा गोलरक्षक सिंह अघि बढेको अवस्थामा बिमलले खालि पोस्टमा गरेको प्रहारले दिशा नलिदा ह्याट्रिकबाट पनि चुक्यो।
८४औं मिनेटमा सव्सिच्युट फरवार्ड रेजिन सुब्बाले गोल गर्दै मछिन्द्रलाई फराकिलो जिततर्फ अग्रसर गराए। उनले बिमलको पासमा गोल गरे।
रेजिन पहिलो हाफको इन्ज्युरी समयमा नुर्लान नोभ्रुजोभको स्थानमा मैदान प्रवेश गरेका थिए।
इन्ज्युरी समयको थप गरिएको दोस्रो मिनेटमा अभिषेक रिजालले गोल गर्दै मछिन्द्रलाई ४-० को सानदार जित दिलाए। उनले कप्तान सुजल श्रेष्ठको पासमा अफसाइड बिट ट्रयाप गर्दै गोल गरे।
जितसँगै अपराजित रहेको शीर्षस्थानको मछिन्द्रको ९ खेलबाट २३ अंक पुगेको छ। मछिन्द्रले दोस्रो स्थानको मनाङलाई ४ अंकले पछि पारेको छ।
बीबीसी ९ खेलमा ६ अंक जोडेर १२ औं स्थानमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
