काठमाडौं- लामो समयदेखि बन्द रहेको कञ्चनपुर सदरमुकाम महेन्द्रनगरस्थित मझगाउँ विमानस्थलमा भौतिक संरचना निर्माणका लागि शिलान्यास गरिएको छ।
संस्कृति पर्यटन तथा नागरिक उड्डयन मन्त्री प्रेम आलेले बुधबार एक कार्यक्रमकाबीच मझगाउँ विमानस्थलको शिलान्यास गरेका हुन्।
२३ वर्षदेखि बन्द रहेको विमानस्थल पुनः सुचारु गर्नका लागि लामो समयदेखि महेन्द्रनगरवासीले माग राख्दै आएका थिए।
उनीहरुले संघर्ष समिति नै बनाएर विमानस्थलको काम अघि बढाउन दवाव सिर्जना गरेका थिए। बुधबार शिलान्यास भएसँगै बन्द रहेको विमानस्थल पुनः निर्माणको काम अघि बढ्ने भएको छ। मझगाउँ विमानस्थल चुनावको बेला राजनीतिक मुद्दा बन्दै आइरहेको थियो। तर, संघीय सरकारले त्यसमा चासो देखाएको थिएन। तत्कालीन केपी शर्मा ओली नेतृत्वको सरकारले विमानस्थल सुचारु गर्नका लागि प्रक्रिया अघि बढाएको थियो। अहिले प्रेम आले संस्कृति पर्यटन तथा नागरिक उड्डयन मन्त्री बनेपछि यसका लागि थप काम अघि बढेको हो।
भौतिक संरचना निर्माणका लागि यसअघि नै अर्थमन्त्रालयले बजेट विनियोजन गरिसकेको थियो। टेन्डर भएपछि अहिले शिलान्यास गरिएको हो।
मझगाउँ विमानस्थलमा १ हजार ५ सय मिटरको रनवे, टर्मिनल भवन र ट्याक्सी स्ट्यान्डलगायत आवश्यक संरचना निर्माण हुने छन्। नागरिक उड्डयन प्राधिकरणले भौतिक संरचना निर्माणका लागि २ करोड ५१ लख बजेट विनियोजन गरि ठेक्का सम्झौता समेत गरेको छ । निर्माणको जिम्मा कान्छाराम केएस जेभी निर्माण सेवाले पाएको छ।
विमानस्थल पुनःनिर्माणका लागि संघ सरकारको ५० प्रतिशत, प्रदेश सरकारको २५ प्रतिशत, भीमदत्त नगरपालिकाको १५ प्रतिशत र दोधाराचाँदनी नगरपालिकाको १० प्रतिशत लगानी रहनेछ।
मझगाउँ विमानस्थल बन्द हुनुअघि सुदूरपश्चिमका पहाडी जिल्ला बैतडीको गोकुलेश्वर, अछामको साँफेबगर र बाजुराको कोल्टी लगायतका क्षेत्रमा उडान हुँदै आएको थियो भने सातामा एक पटक काठमाडौं पनि उडान हुने गरेको थियो। वर्षौदेखि बन्द रहेको विमानस्थल गौचरणमा परिणत भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
