काठमाडौं- सहिद स्मारक ए डिभिजन लिगमा विभागीय टोली नेपाल पुलिस क्लब र ब्रिगेड ब्वाइज (बीबीसी)ले अंक बाँडेका छन्।
त्रिपुरेश्वरस्थित दशरथ रंगशालामा सम्पन्न लिगको आठौं चरणको अन्तिम खेलमा सोमबार पुलिस ब्रिगेड ब्वाइजले १-१ गोलको बराबरी खेल्दै अंक बाँडेका हुन्।
चार मिनेटमै दुई गोल हुँदा खेल रोमाञ्चक देखिए पनि त्यसपछि खेलको अधिकांश समय खेलाडी बलमै रूम्लिँदा दुवै टोलीले अंक बाँडे।
पुलिसविरुद्ध बीबीसीले अग्रता लिए पनि जोगाउन नसक्दा बराबरीमा चित्त बुझाउनुपर्यो। खेलको पहिलो हाफमा एक-एक गोल गरेका दुवै टोलीले दोस्रो हाफमा गोल गर्न सकेनन्।
खेलको दोस्रो मिनेटमा नै ब्रिगेड ब्वाइजका शिशिर लेखीको प्रहार पुलिसका गोलरक्षक शत्रुधन चौधरीले पन्च गर्दै बचाएका थिए। तर, त्यसैको रिबाउण्डमा आएको बललाई रोशन आले मगरले गोलमा परिणत गरे।
त्यसको दुई मिनेटमा नै बुद्ध तामाङले फ्रिकिकमा गोल गर्दै पुलिसलाई खेलमा फर्काए।
खेलको १३औं मिनेटमा जोनाथन रोडीको फ्रिकिक प्रहार सेकेण्ड बारमा लाग्दै बाहिरिँदा ब्रिगेड ब्वाइजले अग्रता बनाउन चुक्यो।
दोस्रो हाफमा दुवै टोलीले केही अवसर पाए पनि त्यसलाई सदुपयोग गर्न सकेनन्।
जारी लिगमा पुलिसको यो चौथो बराबरी हो। बराबरीसँगै पुलिस ७ अंकमा ११औं स्थानमा यथावत् छ।
उसले ८ खेलमा १ जित, ४ बराबरी र ३ खेलमा हार बेहोरेको छ।
यता, ब्रिगेड ब्वाइजको यो तेस्रो बराबरी हो। उसले एक खेलमा जित, ३ मा बराबरी र ४ खेलमा हार भोग्दै ६ अंक बनाएको छ। ब्रिगेड ब्वाइज १२औं स्थानमा छ।
डिफेन्स कमजोर देखियो : पुलिस
पुलिसका मुख्य प्रशिक्षक अनन्त राज थापाले जित्नैपर्ने खेलमा डिफेन्सका कारण बराबरीमा रोकिएको भन्दै अंक तालिकामा सुधार गर्ने सुवर्ण मौका खेर गएको बताए।
'आफूभन्दा तलको टिमलाई ३ अंक नदिने रणनीति थियो। तर, डिफेन्स कमजोर देखियो,' उनले भने, 'जितेको भए हामी माथि जाने थियौं। अट्याकिङ खेल्दा खेल्दै पनि डिफेन्सका कारण चुक्यौं।'
उनले फुटबल आधुनिक भइसकेको बताउँदै आफ्नो टोलीले पनि विदेशी खेलाडी ल्याउनु पर्ने धारणा व्यक्त गरे।
'फुटबल मोर्डन भइसक्यो। त्यही अनुसार सबै व्यवसायिक हुनुपर्छ। अब हामीले पनि विदेशी खेलाडी ल्याउनु पर्छ। सबै टोलीमा विदेशी खेलाडी हुँदा राम्रो खेलिरहेका छन्। हामीले पनि त्यसतर्फ सोच्नु पर्छ,' उनले भने।
यता,ब्रिगेड ब्वाइजका प्रशिक्षक सनोज श्रेष्ठले मार्किङमा चुक्ता रेलिगेसन दबाब थपिएको बताए।
'सुरुमै गोल निकाल्न सफल भयौं। तर, मार्किङमा चुक्दा गोल खान पुग्यौं,' उनले भने, 'आजको बराबरीले दबाब सिर्जना गरेको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
