काठमाडौं- भारतको राजधानी नयाँ दिल्लीमा कोरोना संक्रमणको गति अनियन्त्रित भएको छ। पछिल्लो २४ घण्टामा १० हजारभन्दा बढी नयाँ संक्रमित थपिएका छन्। यस क्रममा ८ जनाको मृत्युसमेत भएको छ।
दिल्ली सरकारले बुधबार जारी गरेको स्वास्थ्य बुलेटिन अनुसार पछिल्लो २४ घण्टामा राज्यमा कुल १० हजार ६६५ जनामा संक्रमण पुष्टि भएको छ।
यसअघि मंगलबार राजधानी दिल्लीमा कुल ५ हजार ४८१ जनामा संक्रमण देखिएको थियो। सोमबार ४ हजार ९९ र आइतबार ३ हजार १९४ जनामा संक्रमण देखिएको छ।
पछिल्लो २४ घण्टामा दिल्लीमा संक्रमितको संख्या दोब्बर भएको छ। तीन दिनमा संक्रमितको संख्या तीन गुणा बढेको छ।पछिल्लो २४ घण्टामा दिल्लीमा ७२ हजारभन्दा बढी मानिसले कुनै पनि प्रकारको कोरोना परीक्षण गरेका छन्। तीमध्ये लगभग १७ हजार ६०० मानिसहरूले द्रुत एन्टिजेन परीक्षण गरेका थिए।
स्वास्थ्य विज्ञहरूका अनुसार यो चिन्ताको विषय हो। अब दिल्लीमा पोजिटिभ दर बढेर ११ दशमलव ८८ प्रतिशत पुगेको छ, जुन मंगलबार ८ दशमलव ३७ प्रतिशत थियो। सोमबार संक्रमण दर ६ दशमलव ५ प्रतिशत रहेको थियो भने आइतबार ४ दशमलव ६ प्रतिशत रहेको थियो।
विश्व स्वास्थ्य संगठनका अनुसार ५ प्रतिशतभन्दा बढीको पोजिटिभ दर खतरनाक मानिन्छ। सक्रिय बिरामीहरूको संख्या बढेर १३ हजार ३०० पुगेको छ।
तर, तीमध्ये ७ सय ८२ जनालाई मात्र अस्पताल भर्ना गर्नुपर्ने थियो। यो कुल बिरामीको ३ प्रतिशतभन्दा थोरै मात्र हो। पछिल्लो २४ घण्टामा अस्पतालमा भर्ना भएका बिरामीमध्ये १ सय ४० जनालाई मात्रै अक्सिजन आवश्यक परेको छ।
२४ घण्टामा करिब दुई लाखलाई खोप
पछिल्लो २४ घण्टामा १ लाख ९८ हजार मानिसले कोरोनाविरुद्धको खोप लिएका छन्। जसमध्ये १ लाख ८ हजारले पहिलो डोज र ९० हजारले दोस्रो डोज लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
