देब गुरुङ भन्छन्– महासचिवका लागि मेरो नाममा पनि प्रस्ताब आएको छ

महाधिवेशन विशेष

नेपाल लाइभ बुधबार, पुस २१, २०७८ १७:३७

काठमाडौं– नेकपा माओवादी केन्द्रका नेता देब गुरुङले पार्टी महासचिवको लागि आफूलाई पनि प्रस्ताव आएको बताएका छन्। अहिले नेताहरु वर्षमान पुन (अनन्त) र जनार्दन शर्मा (प्रभाकर)ले महासचिवका लागि सार्वजनिक रुपमा दाबेदारी प्रस्तुत गरेपनि दुई जनाबीच सहमति जुट्न नसकेको अवस्थाका लागि आफ्नो नाममा प्रस्ताव आएको गुरुङको भनाइ छ।

हालसम्म पार्टीका कुनै पदमा दाबी नगरेको बताउने गुरुङले सहमति मिलाउन महासचिव बन्ने प्रस्ताव आए अस्वीकार नगर्ने र तोकिएको जिम्मेवारी पूरा गर्न तयार रहेको बताए।

‘अहिलेको सन्दर्भमा वर्षमान पुन (अनन्त) र जनार्दन शर्मा (प्रभाकर) को सार्वजनिक रुपमा महासचिवमा दाबेदारी भनेर आइरहेको छ। उहाँहरुको दाबेदारी रहेको स्थितिमा अध्यक्ष कम्रेडले सहमतिमा लैजान पाए हुन्थ्यो भनेर सहमति जुटाउने अधिकतम प्रयास त गरिरहनु भएको छ,' गुरुङले भने, 'उहाँहरु दुईजना बीचमा सहमति हुन नसकिरहेको अवस्थामा तेस्रो सहमतिको उम्मेदवार खोज्नुपर्ने र सहमतिको लागि सिनियर कम्रेडहरु नै खोज्नुपर्छ भन्ने कुरा गरिरहनुभएको छ। अध्यक्षले चाहेको अवस्थामा निर्वाचन नगराइकन सहमतिमै जानुपर्छ भनिरहेको अवस्थामा लिडरशीपले सेटिङ गरेअनुसारको जिम्मेवारी नाई नास्ती गर्ने भन्ने कुरो भएन, अस्वीकार गर्ने भन्ने कुरा हुँदैन। त्यस अवस्थामा ठीक छ तपाईंले चाहनुभएको छ, सहमतिको उम्मेदवार खोज्नुभएको छ भने राम्रो कुरा हो । यो कदमप्रति हाम्रो समर्थन हुन्छ। सहयोग हुन्छ। तोकिएका जिम्मेवारीहरु पूरा गर्न हामी तयार छौं।’

नेता गुरुङले पार्टी र देशकै अभिभावको रुपमा रहेकोले पार्टीमा पुरानो नेतृत्वलाई नै निरन्तरता दिइएको बताएका छन्। पुष्पकमल दाहाल (प्रचण्ड) पार्टी र देशकै अभिभावक भएकाले उनलाई पुन: पार्टी अध्यक्षको जिम्मेवारी दिइएको गुरुङको भनाइ छ।

पार्टीमा अन्य पदाधिकारीहरु कस्तो बनाउने भन्ने कुरा पार्टी अध्यक्ष र पार्टी कमिटीको निर्णयका आधारमा हुने भएकाले सक्षम व्यक्तिहरुलाई चयन गरेर नेतृत्व दिनुपर्ने बताए। बुधवार न्युज एजेन्सी नेपालसँगको कुराकानीमा नेता गुरुङले आउँदो पुस २५ गते बस्ने पार्टी कमिटीको बैठकले पदाधिकारीहरुको बारेमा टुंगो लगाउने पनि जानकारी दिए।

उहाँले पदाधिकारी चयनको विषयमा केही गृहकार्य बाँकी रहेकोले सबैको राय, परामर्श, सुझाव लिएर अगाडि बढ्नुपर्ने बताए।

'स्थायी समितिकै सदस्य वर्षमान पुनजी बाहिर उपचारमा रहनुभएकोले, उहाँले म नफर्कंदासम्म पदाधिकारी नबनाइयोस्, मेरो पनि दाबी बिरोध रहन्छ, भन्ने प्रकारको कुरा रहेकोले सायद अलिकति वेटिङको रुपमा गएको हुनसक्छ। मलाई लाग्छ २५ गते मिटिङ बस्ने भनिएको छ, त्यसमा टुंगोमा पुग्ला,' गुरुङले भने।

नेता गुरुङले पार्टीका पदाधिकारीका लागि निर्वाचन गरिनु नहुने भन्दै पदाधिकारीहरु सहमतिमै चयन गर्नुपर्ने बताए। पदाधिकारीका लागि गरिएको निर्वाचनले क्षणिक समयका लागि लाभ मिले पनि अन्ततः पार्टी विघटनको स्थितिमा पुग्ने दाबी गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

मानव सेवाभन्दा ठूलो अर्को धर्म छैनः राष्ट्रपति

जापानमा बर्डफ्लुको प्रकोप

जय ट्रफी: सन्दीपको कसिलो बलिङमा बागमतीविरुद्ध १०२ रनमै रोकियो मधेश, सन्दीप एक्लैले लिए पाँच विकेट