फाइल तस्बिर
काठमाडौं- पूर्वपर्यटनमन्त्री एवं नेकपा एमालेका सचिव योगेश भट्टराईले नारायणहिटी दरबार संग्रहालयभित्र रेस्टुरेण्ट सञ्चालन गर्न दिने निर्णयमा आफ्नो संलग्नता नभएको बताएका छन्।
उनले सामाजिक सञ्जाल फेसबुकमार्फत् यस्तो प्रस्टीकरण दिएका हुन्। आफू मन्त्री हुनुपूर्व नै त्यहाँ कफी हाउस बनिसकेकोसमेत उनले उल्लेख गरेका छन्।
'नारायणहिटी दरबार संग्रहालयका बारेमा सार्वजनिक भएको समाचारप्रति मेरो गम्भीर ध्यानाकर्षण भएको छ। त्यससम्बन्धी कुनै पनि निर्णयमा मेरो संलग्नता नरहेको स्पष्ट गर्दछु। साथै, त्यस बारेका कुनै पनि निर्णय मेरो जानकारीमासमेत नरहेको सविनय अनुरोध गर्दछु,' उनले लेखेका छन्।
आफ्नो संलग्नता नरहेको कुनै पनि कामप्रति आफ्नो जवफदेहीता नरहने उनले बताएका छन्। 'विनाकसुर कसैको सार्वजनिक छवीमा आँच आउने समाचार र टिप्पणी नगर्न सम्बन्धित सबैमा अनुरोध गर्दछु। मेरो संलग्नता रहेको भए सत्य तथ्य र मेरो हस्ताक्षर सहितको निर्णय कपी वा मेरो लिखित निर्देशनपत्र सार्वजनिक गर्न म चुनौती दिन्छु। स्मरणरहोस म मन्त्री हुनुपूर्व नै त्यहाँ कफी हाउस बनिसकेको थियो,' उनको भनाइ छ।
संस्कृति, पर्यटन तथा नागरिक उड्डयन मन्त्रालयको निर्देशनमा आज नारायणहिटी दरबार संग्रहालय विकास समितिले रेस्टुरेण्ट सञ्चालनका लागि जारी संरचना विस्तारको कार्य तत्कालका लागि रोक्न बी म्यानेजमेण्ट प्रालिलाई पत्राचार गरेको थियो। उक्त पत्र बाहिरिएपछि पूर्वमन्त्री भट्टराईको नामसमेत जोडेर आलोचना हुन थालेपछि उनले प्रस्टीकरण दिएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
