फाइल तस्बिर
काठमाडौं– बागमतीको मुहानस्थलबाट पशुपति क्षेत्रसम्मको नदीमा स्वच्छ पानी बगाउने उद्देश्यले अध्ययन सुरु भएको छ।
बागमती नदीको सुन्दरीजलबाट पशुपति क्षेत्रसम्मको भागमा ढल मिसिएका स्थानको अधिकार सम्पन्न बागमती सभ्यता एकीकृत विकास समिति र काठमाडौं उपत्यका खानेपानी लिमिटेड आयोजना कार्यान्वयन निर्देशनालयले संयुक्त रुपमा अध्ययन सुरु गरेको हो। ढल मिसिएका २ दर्जनस्थानको पानीको गुणस्तर परीक्षण गरिएको छ।
परीक्षणका क्रममा ढल मिसिएको ८० देखि १०० मिटरसम्म पानी बिग्रिएको र त्यसपछि बहने क्रममा गुणस्तर शुद्ध भएको अधिकार सम्पन्न बागमती समितिका सूचना अधिकारी कमल अर्यालले जानकारी दिए। बागमतीको मुहान क्षेत्रकै पानीमा धमिलोपन बढी देखिएको अध्ययन कार्यदलले जनाएको छ।
'मुहान क्षेत्रको गोकर्णमाथि नै चारवटा वासिङ सेन्टर र क्रसरसमेत सञ्चालनमा रहेछन्, ती कम्पनीलाई पनि पत्राचार गरिएको छ, ढल व्यवस्थापन गरेर स्वच्छ पानी बगाउनुपर्छ, गलैँचा एवं विभिन्न उद्योगबाट फोहर पानी आउनेक्रम पनि नरोकिएको भेटिएकाले उद्योग मन्त्रालयसँग समन्वय गरेर कदम चाल्नेछौँ,' उनले भने।
उत्तरवाहिनी क्षेत्रमा गाई फार्मबाट आएको फोहरले पनि बागमती प्रदूषित भएको अध्ययन कार्यदलले फेला पारेको छ। कुकुरलगायत मृत जनावर पनि नदीमा भेटिएको समितिले जनाएको छ। नदी किनारमा कानुन विपरीत काम गर्नेलाई दण्डजरिवाना गर्ने तयारी पनि समितिले गरेको छ।
पशुपति क्षेत्रसम्मको पानीको गुणस्तर सुधार गर्न ढल हालिएका स्थानको अध्ययन गरिएको हो।
पशुपति क्षेत्रसम्मको नदीमा स्वच्छ पानी बगाउने उद्देश्यले २७ वर्षअघि अधिकार सम्पन्न बागमती समितिको स्थापना गरिएको थियो। अध्ययन र पानीको गुणस्तर परीक्षणलाई मनोहरा नदी दोभानसम्म लैजान तयारी भएको छ।
मुहान क्षेत्रकै बागमती प्रदूषित हुन थालेपछि गोकर्णमा प्रशोधन केन्द्र निर्माणका लागि ठेक्कासमेत भएको छ। गोकर्णमा बागमती, सूर्यमती र चन्द्रमतीको पानी प्रशोधन गरिने छ।
बागमती सफाइ अभियानकर्मी ईश्वर पुडासैनीले ज्यालादारीमा सफाइ गरेर बागमतीमा स्वच्छ पानी बगाउन नसकिने बताए। स्वयंसेवी अभियानलाई नै निरन्तरता दिनुपर्नेमा अधिकार सम्पन्न बागमतीले कार्यकर्ता भर्ती गरेर सफाइ अभियानलाई बदनाम गर्न खोजेको उनको आरोप छ।
मुहान क्षेत्रकै गुह्येश्वरी माथिको बागमतीमा फोहर थुपार्ने र जलाउने काम भइरहेकोमा स्थानीय सरकार र अधिकार सम्पन्न बागमती चुप लाग्ने गरेको स्थानीयवासीको गुनासो छ। सरकारी निकायले नै बागमती र यसका सहायक नदी ढल हाल्दा पनि अधिकार सम्पन्न बागमतीले पत्राचारसमेत नगरेकामा अभियानकर्मी पुडासैनीले दुःख व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
