काठमाडौं- नेकपा माओवादी केन्द्रको आठौं राष्ट्रिय महाधिवेशन सकिएको छ। गत आइतबारबाट सुरु भएको महाधिवेशन आज आइतबार सकिएको हो। काठमाडौंको कमलादीस्थित प्रज्ञा प्रतिष्ठानमा आयोजित महाधिवेशनले विभिन्न प्रस्तावहरु पारित गर्नुका साथै नयाँ केन्द्रीय कमिटीको अधिकांश संख्या टुंगो लगाएको छ।
प्रथम राष्ट्रिय सम्मेलनको तयारी गरिरहेको माओवादी केन्द्रले पुस १० गते साँझ स्थायी समितिको बैठकमार्फत मात्रै राष्ट्रिय सम्मेलनलाई आठौं राष्ट्रिय महाधिवेशनमा रुपान्तरण गर्ने निर्णय गरेको थियो। सो निर्णयलाई पुस ११ गते बिहान बसेको केन्द्रीय समितिले अनुमोदन गरेको थियो।
पुस ११ गते माओवादी केन्द्रका अध्यक्ष पुष्पकमल दाहाल 'प्रचण्ड'ले उद्घाटन गरेको महाधिवेशनको उद्घाटन समारोहमा प्रमुख राजनीतिक दलका प्रतिनिधिहरुले सम्बोधन गरेका थिए। प्रधानमन्त्री तथा नेपाली कांग्रेसका सभापति शेरबहादुर देउवा, नेकपा (एकीकृत समाजवादी)का अध्यक्ष माधवकुमार नेपाल, नेकपा (एमाले)का महासचिव शंकर पोखरेल, जनता समाजवादी पार्टीका अध्यक्ष उपेन्द्र यादव, राष्ट्रिय प्रजातन्त्र पार्टीकी महामन्त्री कुन्ती शाही, राष्ट्रिय जनमोर्चाकी उपाध्यक्ष दुर्गा पौडेल, नेकपा (क्रान्तिकारी माओवादी)का नेता सीपी गजुरेल, नेकपा (माले)का महासचिव सीपी मैनालीले सम्बोधन गरेका थिए।
पुस १२ मा महाधिवेशनको बन्द सत्र सुरु भएको थियो। बन्द सत्रको सुरुमा कृष्णबहादुर महराको अध्यक्षतामा सात सदस्यीय अध्यक्ष मण्डल चयन गरिएको थियो। अध्यक्ष मण्डलमा महराका अतिरिक्त गिरिराजमणि पोखरेल, गणेश साह, परशुराम तामाङ, पूर्णाकुमारी सुवेदी, परशुराम रम्तेल र रुपा महर्जन सदस्य रहे।
सोही दिन अध्यक्ष प्रचण्डले ‘२१ औं शताब्दीमा समाजवादको नेपाली बाटो’ शीर्षकमा वैचारिक तथा राजनीतिक दस्तावेज प्रस्तुत गरेका थिए। त्यस्तै, स्थायी कमिटी सदस्य देवप्रसाद गुरुङले पार्टीको विधान मस्यौदा प्रस्तु तगरेका थिए। दुवै दस्तावेजमाथि छलफल गर्न २५ वटा समूह निर्माण गरिएको थियो। समूहको बैठकस्थल समेत तोकियो-
समूह १
सहभागी: जेष्ठ कम्युनिस्ट मञ्च
छलफलको स्थान : प्रज्ञा भवनको सभाहलको मुख्य भाग
समन्वयको जिम्मेवारी : एनके प्रसाईं
समूह २ र ३
सहभागी : सल्लाहकारहरू
छलफलको स्थान : प्रज्ञा भवनको मुख्य मञ्चको दायाँ बायाँ
समन्वयको जिम्मेवारी : नन्दकुमार थापा
समूह ४ र ५
सहभागी : प्रदेश १ का प्रतिनिधिहरु
छलफलको स्थान : भानुभक्त हल, प्रज्ञा भवन
समन्वय गर्ने जिम्मेवारी : हर्क नेम्वाङ
समूह ६ र ७
सहभागी : प्रदेश २ का प्रतिनिधिहरु
छलफलको स्थान : पारिजात हल, प्रज्ञा भवन
समन्वय गर्ने जिम्मेवारी : गणेश साह
समूह ८ र ९
सहभागी : लुम्बिनी प्रदेशका प्रतिनिधिहरु
छलफलको स्थान : सिद्धिचरण हल, प्रज्ञा भवन
समन्वय गर्ने जिम्मेवारी : चक्रपाणि खनाल
समूह १० र ११
सहभागी : गण्डकी प्रदेशका प्रतिनिधिहरु
छलफलको स्थान : पार्टी कार्यालय, पेरिसडाँडा
समन्वय गर्ने जिम्मेवारी : गायत्री गुरुङ
समूह १२
सहभागी : प्रवास प्रदेशका प्रतिनिधिहरु
छलफलको स्थान : पार्टी कार्यालय पेरिसडाँडा
समन्वय गर्ने जिम्मेवारी : लक्ष्मण पन्त
समूह १३ र १४
सहभागी : कर्णाली प्रदेशका प्रतिनिधिहरु
छलफलको स्थान : एवान पार्टी प्यालेस
संयोजन गर्ने जिम्मेवारी : विमला केसी
समूह १५ र १६
सहभागी : सुदूरपश्चिम प्रदेशका प्रतिनिधिहरु
छलफलको स्थान : एवान पार्टी प्यालेस
समन्वय गर्ने जिम्मेवारी : खगराज भट्ट
समूह १७ र १८
सहभागी : सम्पूर्ण विभागका प्रतिनिधिहरु
छलफलको स्थान : क्वालिटी बैंकट, बुद्धनगर
समन्वय गर्ने जिम्मवारी : मायाप्रसाद शर्मा
समूह १९
सहभागी : उपत्यका विशेष प्रदेशका प्रतिनिधिहरु
छलफलको स्थान : क्वालिटी बैंकट, बुद्धनगर
समन्वय गर्ने जिम्मेवारी : जगत सिंखडा
समूह २० र २१
सहभागी : सम्पर्क समन्वय प्रदेशका प्रतिनिधिहरु
छलफलको स्थान : क्रिष्टल पार्टी प्यालेस, बिजुली बजार
समन्वय गर्ने जिम्मेवारी : कृष्ण अधिकारी
समूह २२ र २३
सहभागी : बागमती प्रदेशका प्रतिनिधिहरु
छलफलको स्थान : काठमाडौं बैंक्वेट, थापागाउँ
समन्वय गर्ने जिम्मेवारी : सरल सहयात्री
समूह २४
सहभागी : आयोगका सदस्यहरु
छलफलको स्थान : काठमाडौं बैंक्वेट, थापागाउँ
समन्वय गर्ने जिम्मेवारी : विष्णुपुकार श्रेष्ठ
समूह २५
सहभागी : जनवर्गीय संगठन र मोर्चाका इन्चार्ज र अध्यक्षहरु, केन्द्रीय कार्यालय, एकताबाट आएका प्रतिनिधिहरु
छलफल गर्ने स्थान : काठमाडौं बैंक्वेट, थापागाउँ
समन्वय गर्ने जिम्मेवारी : अमृता थापामगर
२५ वटा समूहले १३ गते दिनभर र १४ गते दिउँसोसम्म छलफल गरे। १४ गते दिउँसोदेखि सुरु भएको बन्दसत्रमा विभिन्न समूहमा भएको छलफलको निष्कर्ष प्रस्तुत गर्ने क्रम सुरु भयो। त्यसदिन ११ वटा समूहको मात्रै प्रस्तुति सकियो।
१४ गते सल्लाहकार समूहको तर्फबाट रामनारायण बिडारी, प्रदेश २ बाट सत्यनारायण भगत, आयोगको तर्फबाट टंक राई, गण्डकी प्रदेशबाट गायत्री गुरुङ, प्रदेश १ बाट अजम्बर काम्वाङ राई र हर्कबहादुर नेम्वाङ, प्रवास समन्वय समितिबाट मनऋषि धिताल, बागमती प्रदेशबाट सरल सहयात्री, केन्द्रीय विभागबाट गीता पनेरु, सुदूरपश्चिम प्रदेशबाट मिनबहादुर कँवर र कर्णाली प्रदेशबाट विमला केसीले आ-आफ्नो समूहको निष्कर्ष प्रस्तुत गरे।
१५ गते सम्पर्क मञ्च प्रदेश कमिटीको तर्फबाट कृष्ण अधिकारी, सल्लाहकारहरुको समूह ‘क’ बाट चित्रबहादुर श्रेष्ठ, समूह १३ कर्णाली प्रदेशबाट गोपाल शर्मा, उपत्यका विशेष प्रदेश समूहबाट जगत सिंखडा, समूह १६ सुदूरपश्चिम प्रदेशको तर्फबाट मानबहादुर धामी, समूह २२ बागमती प्रदेशबाट इन्द्रबहादुर थिङ ‘छिन्ताङ’, समूह ११ गण्डकी प्रदेशबाट देवेन्द्र पराजुली, ज्येष्ठ कम्युनिष्ट मञ्चको समूहबाट नन्दकुमार प्रसाईं, समूह ८ लुम्बिनी प्रदेशको तर्फबाट सुदर्शन बरालमगर, केन्द्रीय विभागबाट घनश्याम रजक, समूह २५ जनवर्गीय संगठन तथा मोर्चाबाट सुरेश आलेमगर, समूह ९, लुम्बिनी प्रदेशबाट नारायण अधिकारी र प्रदेश २ बाट भवानी थापाले आ–आफ्नो समूहमा भएका छलफलको निष्कर्ष प्रस्तुत गरेका थिए।
समूहगत छलफलका लागि २५ वटा समूह गठन गरिएकोमा सम्पर्क मञ्च प्रदेशको दुई समूहलाई एउटै समूहमा राखिएपछि समूहको संख्या २४ वटा बनेको थियो।
समूहगत छलफलमा माओवादीका स्थायी समिति सदस्य राम कार्कीले ‘केही पुरक, केही नवीन धारणाहरु’ र केन्द्रीय सदस्य लेखनाथ न्यौपानेले फरक मत पनि राखेका थिए।
१६ गतेको बन्दसत्रमा केन्द्रीय निर्वाचन आयोगका प्रमुख विष्णुपुकार श्रेष्ठ, केन्द्रीय अनुशासन आयोगका प्रमुख टंक राई र केन्द्रीय लेखा आयोगका प्रमुख पेशल खतिवडाले आयोगका प्रतिवेदनहरु प्रस्तुत गरेका थिए।
सोही दिन अध्यक्ष प्रचण्डले आफ्नो प्रतिवेदनमाथि विभिन्न समूहमा भएको छलफल र त्यहाँ उठेका प्रश्नका जवाफ दिएका थिए। त्यस क्रममा उनले स्थायी कमिटी सदस्य राम कार्कीले राखेको पुरक प्रस्तावलाई स्वीकार गरेर दस्तावेजमा समावेश गर्ने र केन्द्रीय सदस्य लेखनाथ न्यौपानेले राखेको भिन्न मतलाई भिन्न मतकै रुपमा स्वीकारेको जानकारी गरे। त्यसैगरी २४ वटै समूहगत छलफलबाट आएका महत्त्वपूर्ण निष्कर्षहरुलाई दस्तावेजमा समेट्ने जानकारी गराएका थिए।
सोही दिन प्रचण्डको प्रतिवेदन सर्वसम्मत ढंगले पारित भएको थियो।
१७ गते बिहान ११ बजे सुरु भएको बन्दसत्रमा स्थायी समिति सदस्य देव गुरुङद्वारा प्रस्तुत विधान मस्यौदा प्रस्तावमाथि उठेका जिज्ञासाको जवाफ दिएका थिए। साथै, बन्दसत्रले विधान पारित गरेको थियो।
यसैबीच, माओवादीको केन्द्रीय समिति सदस्य सहमतिमै टुंग्याउने प्रयास पनि भइरहेको थियो। सहमति हुन नसकेमा लोकतान्त्रिक प्रक्रिया अपनाउने (निर्वाचन गर्ने) प्रचण्डले बताइरहेका थिए। त्यसैले निर्वाचन आयोगले १७ गते सार्वजनिक गरेको निर्वाचन कार्यतालिका दुई पटकसम्म संशोधन भएको थियो।
१७ गतेको बन्दसत्रमा प्रचण्डले १८ गतेसम्म सहमति गर्ने भन्दै समय मागेका थिए। त्यसैले आज (१८) गतेको बैठकअघि बसेको स्थायी समिति बैठकमा नाममा सहमति जुटाउने प्रयास गरिएको थियो। सहमति जुटेसँगै साढे ४ बजे बसेको बन्दसत्रमा उनले नामहरु प्रस्तुत गरेका थिए।
प्रचण्डले नामहरु प्रस्तुत गर्नुअघि बन्दसत्रले पार्टीको केन्द्रीय कार्यालयका मुख्य सचिव श्रीराम ढकालले आठौं राष्ट्रिय महाधिवेशनको आय व्यय प्रस्तुत गरेका थिए। जुन पारित गरिएको थियो। पार्टीको यसअघिको केन्द्रीय अनुशासन, निर्वाचन र लेखा आयोगका पदाधिकारी र सदस्यहरुलाई अनुमोदन गरेको थियो। त्यस्तै, स्थायी समिति सदस्य गिरिराजमणि पोखरेलले समसामयिक प्रस्ताव प्रस्तुत गरेका थिए। त्यो पनि सर्वसम्मत पारित भएको छ।
माओवादी विधानमा २९९ केन्द्रीय सदस्य हुने भनिए पनि प्रचण्डले २३६ जनाको नाम प्रस्तुत गरेका थिए। ती नामहरु अनुमोदन भएको छ। बाँकी ६३ जना सदस्य मनोनयन गर्ने जिम्मा प्रचण्डलाई दिएको छ।
नवगठित केन्द्रीय समितिको बैठक सोमबार नै बसेर पदाधिकारीको टुंगो लगाउने भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765528419.png)
-1763721444.png)
-1765273665.jpg)
