तुलसीपुर- दाङको तुलसीपुरबाट खैरो हेरोइनसहित पाँच जनालाई पक्राउ गरिएको छ। इलाका प्रहरी कार्यालय तुलसीपुरका प्रहरी नायव उपरीक्षक श्यामु अर्यालका अनुसार दुई दिनको अवधिमा तीन महिला र दुई पुरुषलाई पक्राउ गरिएको हो।
पक्राउ पर्नेमा तुलसीपुर उपमहानगरपालिका-५ निवासी १९ वर्षीया मन्दिरा थापा, सोही वडाकै १९ वर्षीया दीपु नेपाली, तुलसीपुर-६ बरुवागाउँका २९ वर्षीया रूद्रमणि पोखरेल शर्मा, सोही ठाउँकी २४ वर्षीया उर्मिला चौधरी र तुलसीपुर-७ को सागरनगर टोलका ३० वर्षीय कैलाश नेपाली रहेका छन्। उनीहरूको साथबाट पाँच ग्राम ७१० मिलिग्राम खैरो हेरोइन बरामद गरिएको हो।
सुतेको अवस्थामा निसास्सिएर मृत्यु
दाङमा कोइला बालेर सुतेका एक व्यक्तिको निसास्सिएर मृत्यु भएको छ। झ्यालढोका थुनेर कोइला बालेर सुतेका प्यूठान घर भइ हाल लमही नगरपालिका-९ अमिलिया बस्दै आएका २९ वर्षीय कुसुम सुनारको मृत्यु भएको हो।
वडा प्रहरी कार्यालय लमहीका प्रहरी निरीक्षक राजन पौडेलका अनुसार शुक्रबार राति सुनारका श्रीमान् श्रीमती कोइला बालेर सुतेका थिए। बिहान ४ बजेतिर उनकी श्रीमती उठ्ने बेला उनको मृत्यु भइसकेको थियो। श्रीमतीको पनि रक्तचाप कम भइसकेको अवस्थामा उपचारका लागि अस्पताल लगिएको थियो। उनको अवस्था सामान्य छ।
उनको शव भने घरभित्रै रहेको छ। प्यूठानबाट घरपरिवार आएपछि मात्रै उठाएर शव परीक्षणका लागि लमही अस्पताल लगिने प्रहरी निरीक्षक पौडेलले बताए। सुनार अमिलियाको शोभा होटलमा खान बनाउने काम गर्दै आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
