काठमाडौं- विभागीय टोली त्रिभुवन आर्मी क्लव अर्को विभागीय टोली नेपाल एपीएफ फुटबल क्लवसँग बराबरीमा रोकिएको छ। सहिद स्मारक ‘ए’ डिभिजन लिगमा आर्मी र एपीएफले १-१ गोलको बराबरी खेल्दै अंक बाँडेका हुन्।
त्रिपुरेश्वरस्थित दशरथ रंगशालामा शुक्रबार भएको खेलको ६३औं मिनेटमा जर्जप्रिन्स कार्कीले गोल गर्दै आर्मीलाई १-० को अग्रता दिलाएका थिए। दिनेश हेन्जनको पासमा जर्जप्रिन्सले ५ डिफेन्डरबीचबाट गरेको प्रहार डिफेन्डर राजन गुरुङलाई लाग्दै गोलमा परिणत भएको थियो।
तर, ६६औं मिनेटमा विक्की तामाङले गोल गर्दै खेललाई १-१ गोलको बराबरीमा ल्याए। नवीन लामाको प्रहारलाई गोलरक्षक विकेश कुथुले नियन्त्रणमा लिन नसकेको बललाई विक्कीले जाली चुमाए।
त्यसअघि पाँचौ मिनेटमा जर्जप्रिन्सको पेनाल्टी बक्स बाहिरको प्रहारलाई एपीएफका गोलरक्षक युया कुरियामाले दोस्रो प्रयासमा नियन्त्रणामा लिँदा आर्मी अग्रता लिनबाट चुक्यो।
नवौं मिनेटमा कप्तान भरत खवासको पेनाल्टी बक्सबाहिरको प्रहारलाई गोलरक्षक युयाले पञ्च गर्दै खतरा टारे। १३औं मिनेटमा जगजित श्रेष्ठको क्रस पासमा जर्जप्रिन्सले नियन्त्रणमा लिँदै गरेको प्रहारलाई सविन थापाले क्लियर गरे।
३८औं मिनेटमा आशिष लामाको 'वान भर्सेस वान'को प्रहार गोलरक्षक विकेशलाई लाग्दै पोस्टतर्फ अघि बढेको थियो। तर, उक्त बललाई डिफेन्डर युद्ध शाहीले बचाए।
८३औं मिनेटमा विवेक बस्नेतको क्रसलाई गोलरक्षक युयाले नियन्त्रणमा लिन नसकेको बललाई जर्जप्रिन्सले दोहोरो प्रयास गरेपनि सफल हुन सकेनन्।
बराबरीसँगै आर्मी ७ खेलबाट ११ अंक जोडेर चौथो स्थानमा यथावत् रहेको छ। आर्मीको यो पाँचौं बराबरी हो। यसअघि आर्मीले नेपाल पुलिस, मछिन्द्र फुटबल क्लव, सातदोबाटो युथ क्लव र थ्रीस्टार क्लवसँग बराबरी खेल्दै अंक बाँडेको थियो।
यस्तै, आर्मीले च्यासल युथ क्लव र ब्रिगेड ब्वाइजसँग ३/३ अंक खोसेको थियो।
समान ७ खेलबाट एपीएफ ६ अंक जोडेर ११औं स्थानमा रहेको छ। यसअघि एपीएफले थ्रीस्टार र न्यूरोड टिम (एनआरटी)सँग बराबरी खेल्दै अंक बाँडेको थियो। लिगमा फ्रेन्ड्स क्लवलाई पराजित गर्दा ब्रिगेड ब्वाइज, च्यासल र सातदोबाटोसँग हार बेहोरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
