काठमाडौं– अख्तियार दुरुपयोग अनुसन्धान आयोगले नेपाल प्रहरीका बहालवाला डीएसपीदेखि पूर्वआईजीपीसम्मका भ्रष्टाचार मुद्दा तामेलीमा राखेको छ। अख्तियार दुरुपयोग गरेर भ्रष्टाचार गरेको भन्दै परेको उजुरीमा अख्तियारले नेपाल प्रहरीका पूर्वआईजीपी सर्वेन्द्र खनालदेखि सशस्त्र प्रहरी बलका पूर्वआईजीपी कोषराज वन्तसम्मको मुद्दा तामेलीमा राखेको हो।
उनीहरुविरुद्धको कसूर तत्काल प्रमाणित हुन नसक्ने भन्दै अख्तियारले हालका लागि मुद्दा तामेलीमा राखेको छ। राष्ट्रपति विद्यादेवी भण्डारीसमक्ष पेस गरिएको आयोगको वार्षिक प्रतिवेदनमा मुद्दा तामेलीमा राखिएको उजागर भएको हो।
पूर्वआईजी खनालविरुद्ध ३० वटा स्कर्टिङ मोटरसाइकल खरिद गर्न बोलपत्र आह्वान गरेकोमा रित नपुगेका आपूर्तिकर्तालाई आसयको सूचना जारी गरेको, मोटरसाइकलको मूल्य अन्तरार्ष्ट्रिय मूल्यभन्दा धेरै कायम गरिएको, बोलपत्रमा मोटसाइकलको कर तथा भ्याटसहित उल्लेख भएको मूल्य र अन्तरार्ष्ट्रिय मूल्यलाई नेपालीमा रुपान्तरण गर्दा ५ करोडसम्म फरक परेको देखिएको भन्दै उजुरी परेको थियो।
प्रकाश अर्याल आईजीपी हुँदा कम गुणस्तर भएको भनेर रद्द गरिएको प्रहरीको लत्ताकपडा खरिद, १५ हजार थान बुट आफू आईजीपी हुँदा स्वीकारेको, प्रहरीको स्कर्टिङ मोटरसाइकल किन्दा भ्रष्टाचार भएको भन्दै खनालविरुद्ध अख्तियारमा उजुरी परेको थियो। त्यसपछि प्रहरी प्रधान कार्यालयबाट २०७६ भदौ २० गते अख्तियारले कागजात नियन्त्रणमा लिएको थियो। आयोगको वार्षिक प्रतिवेदनमा उल्लेख भएअनुसार यो मुद्दा गत असार १७ गते तामेलीमा राख्ने निर्णय भएको हो।
जय सलिना इन्टरप्राइजेज र जयश्री सप्लायर्सले ३८ करोड ७३ लाख ६० हजार रुपैयाँ बराबरको सामान २०७६ असार मसान्तसम्म आपूर्ति गरिसक्नुपर्नेमा आपूर्ति नगरी पुरानो स्टक सामानलाई नयाँ आम्दानीमा बाँधेर देखाएको भन्दै अख्तियारमा खनालविरुद्ध उजुरी परेको थियो।
हालका अख्तियार प्रमुख प्रेमकुमार राई गृहसचिव हुँदा खनाल आईजीपी थिए। एमालेनिकट मानिएका राईलाई एमाले अध्यक्ष केपी शर्मा ओलीले अख्तियारको प्रमुख आयुक्तमा नियक्त गरेका हुन्। खनाल पनि पछिल्लो समय एमालेनिकट छन्। उनी एमालेमा प्रवेश गर्ने तयारीमा रहेको एमाले नेताहरूले बताउने गरेका छन्।
आयोगको वार्षिक प्रतिवेदनमा उल्लेख भएअनुसार केही समयअघि घुससहित आफ्नै कार्यकक्षबाट रंगेहात पक्राउ परेका महानगरीय प्रहरी वृत्त, बौद्धका तत्कालीन डीएसपी श्यामकुमार राईविरुद्ध परेको उजुरी पनि तामेलीमा राखिएको छ। २०७५ असोज २० गते सेवाग्राहीसँग १ लाख ४० हजार रुपैयाँ घुस लिँदै गर्दा डीएसपी राई पक्राउ परेका थिए। पछि उनले विशेष अदालतबाट सफाइ पाएका थिए। तत्कालीन गृहसचिव प्रेमकुमार राईसँगको निकटताकै कारण राईले 'आकर्षक' मानिने बौद्ध वृत्तको इन्चार्ज पाएका थिए। अहिले उनै राई अख्तियारको प्रमुख आयुक्तको रुपमा कार्यरत छन्।
राई प्रमुख आयुक्त भएकै बेला उनीविरुद्ध उजुरीसमेत परेको थियो। घुस मुद्दाबाट सफाइ पाउनकै लागि राईले उक्त मुद्दाको सक्कल मिसिलमा संलग्न जाहेरी निवेदन, बरामदी मुचुल्का, खानतलासी मुचुल्कामा उल्लेख रकम र मिति–बार लगायत विषयहरु सच्याएको आरोप लागेको थियो। उक्त आरोपसहित उनीविरुद्ध अख्तियारमा निवेदन परेका थियो। तर, उजुरीउपर कुनै कारबाही प्रक्रिया अघि नबढाई तत्काललाई प्रमाण नपुगेको भन्दै तामेलीमा राखिएको छ।
उता, सशस्त्र प्रहरी बलका पूर्वआईजीपी कोषराज वन्तको मुद्दा पनि तामेलीमा राखिएको छ। वन्तको फाइल २०७७ साउन ५ मा तामेलीमा राख्ने निर्णय अख्तियारले गरेको थियो।
त्यसैगरी, एसएसपी किरण बज्राचार्यको मुद्दा तामेलीमा छ। महानगरीय प्रहरी परिसर भक्तपुरका तत्कालीन एसपी (हाल एसएसपी) बज्राचार्यले ‘घरखर्च चलाउन र भोजभतेर गरी चाकडी गर्न लेखापालहरुलाई नक्कली बिल भरपाई बनाउन लगाएर लाखौं सरकारी रकम निकाल्न लगाई खर्च गराउने गरेको’ भन्दै अख्तियारमा उजुरी परेको थियो। उक्त उजुरी पनि अख्तियारले तामेलीमा राखेको छ।
सशस्त्र प्रहरी बलको ३८ नम्बर गुल्म रुपन्देहीका कार्यालय प्रमुखको मिलेमतोमा गैरकानुनी तरिकाले रासनको रकम भुक्तानीमा हिनामिना गरी बाँडीचुडी खाएको विषयको उजुरी पनि तामेलीमा राखिएको छ। त्यसबेला ३८ नम्बर गुल्मको प्रमुख को थिए भन्नेबारे अख्तियारले केही खुलाएको छैन।
त्यस्तै, कर फर्स्योट आयोगका अध्यक्ष लुम्बध्वज महतको अनुसन्धान फाइल आयोगको बैठकले तामेलीमा राख्ने निर्णय गरेको छ। दक्षिण कोरियाका पूर्वराजदूत कमानसिंह लामाको मुद्दा पनि तामेलीमा राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
