अहिले देशैभरि चिसो बढिरहेको छ। चिसो बढेसँगै यससँगै सम्बन्धित बिरामीहरु पनि बढेका छन्। दीर्घ रोग भएकादेखि चिसोबाट हुने पखाला, रुघाखोकी, निमोनियाको बिरामी बढेका छन्। चिसोमा दम र बाथका रोगीहरुलाई बढी च्याप्ने गरेको चिकित्सकहरु बताउँछन्। बाथ रोगका बिरामीको कसरी हेरचाह गर्ने, औषधि उपचार कसरि गर्ने, अन्य रोग र बाथरोगको लक्षण कसरी छुट्याउने भन्ने बारे चिकित्सक डा अभिलाषा शाहसँग न्युज एजेन्सी नेपालले कुराकानी गरेको छ। प्रस्तुत छ डा शाहसँग गरिएको कुराकानी :
तपाईंले दिनहुँ बाथरोगका बिरामी जाँच गर्नुहुन्छ, कस्तो छ नेपालमा बाथरोगको अवस्था?
नेपालमा बाथरोग धेरै नै देखिएको छ। तर, त्यसको डाइगोनोसिस मात्रै नभएको हो। पहिला त बाथरोग भनेको के हो भन्नेनै धेरैले बुझेका छैनन्। सचेतना जानकारी नभएर पनि होला। बाथरोगको लक्षणहरु देखेपछि विशेषज्ञकोमा नगइकन यो डाइगोनोसिस नभएको हुनाले मात्र बाथरोग भन्ने, खाली बुढाबुढीलाई मात्र हुन्छ भन्ने एउटा गलत बुझाइ र धारणा छ।
डब्ल्यूएचओको तथ्यांकअनुसार विश्वमा १० प्रतिशत भन्दा धेरैलाई बाथरोग छ। नेपालमा कति जनालाई बाथ छ, के छ? भन्नेबारे अध्ययन भएको छैन। तर, अहिले बिस्तारै बिस्तारै सचेतना बढ्न थाल्यो, डाइनोसिस हुन थाल्यो। त्यसपछि बाथका बिरामीहरु दिनदिनै बढेको देखिन्छ।
बाथरोग कस्तो रोग हो र कसरी मानिसमा देखा पर्दछ?
बाथरोग एक प्रकारको अटो इम्युनडिजिज पनि हो। अटो इम्युन भन्नाले के हो भने, जुन हाम्रो रोगसँग लड्ने शक्ति हुन्छ, जसलाई इम्युन सिस्टम भनिन्छ। बाथरोगको बिरामीहरुमा यो इम्युन सिस्टम अटोम्याटिकली काम काम गर्ने हुन्छ। अटोम्याटिकली आफ्नै अंगहरुलाई हानी, नोक्शानी पुर्याउने, जस्तै जोर्नीदेखि लिएर भित्रि अंग मुटु, मिर्गौला, कलेजो, फोक्सो, आँखा, छाला, विभिन्न अंगमा असर गर्ने देखिन्छ। यो एउटा अटो इम्युन रोग हो। कुनै बाथरोग वंशाणुगत पनि आएको देखिन्छ। स्पनडाइलो अथराइटिस भन्ने बाथरोग भयो, वंशानुगत आउने बाथ पनि हो। कुनै बाथ जसले मांशापेशीलाई मात्र असर गर्दछ।
कसैलाई बाथरोग छ भनेर कसरी थाहा पाउने, प्रारम्भिक रुपमा कसरी अनुमान गर्न सकिन्छ?
सामान्यतया जोर्नीहरु दुख्ने, सानो तथा ठूलो जोनीहरु दुख्ने, जोर्नीहरु सुन्निने, बिहान सुतेर उठ्दा जोर्नीहरु कक्रक्क पर्ने, रेस्ट गरेर उठ्दा जोर्नीहरु मुठि पार्न गाह्रो हुने, टाइट हुने लगायतका बाथको शुरुवाती लक्षण हो। बाथअनुसार लक्षण पनि फरक फरक नै हुन्छ। जस्तै गठियाबाथमा जोर्नी दुख्ने हुन्छ। बाथ सयौँ प्रकारको हुन्छ। जति खालको बाथ हुन्छ लक्षण पनि त्यस्तै फरक हुन्छ ।
सामान्य लक्षणहरु त जोर्नी दुख्ने, सुन्निनेहरु नै हो। कपाल झर्ने, पातलो हुने, घाममा जाँदा अनुहार रातो हुने, जसलाई बटरफ्लाई र्यास भनिन्छ। गाला रातो हुने, मुखमा बारम्बार घाउहरु निस्किने, चिसोमा औँलाहरु नीलो, सेतो हुने, छालामा डाबरहरु आउनेदेखि लिएर लामो समयदेखि ज्वरो आउने, विभिन्न लक्षण बाथमा देखा पर्छन्।
चिसोमा बाथका बिरामीहरुलाई बढी समस्या हुन्छ भनिन्छ, किन होला?
अब त्यो कारण के हुनसक्छ भने जुन पेनको रिसेप्टरहरु हुन्छन्, पेनको पोइन्टहरु जुन मान्छेहरुमा हुन्छ, चिसोले त्यसलाई बढी सेन्सेटाइज गरेर बाथले जाडोमा बढी दु:ख दिने हुन्छ। त्यो भन्दैमा बाथ जाडोमा मात्रै देखापर्ने हुँदैन। बाथ गर्मीमा पनि उत्तिकै मात्रामा देखिन्छ। तर जाडोमा धेरै बिरामीहरुलाई बाथले दुःख दिएको यही कारणले गर्दा नै हो।
बाथ रोगीको कसरी हेरचाह गर्ने, कस्तो खानपिन गर्ने, कस्तो औषधि लिने?
बाथको बिरामीहरुले जाडोमा गर्नुपर्ने तातो, न्यानो, लुगा लगाउने, तातो भएर बस्ने, चिसो पानी नचलाउने, चिसोबाट टाढा बस्ने, फ्रिजको कुराहरु कोक, फेन्टाहरु नखाने, तातो गरेर वार्म गर्ने, आफ्नो जोर्नीहरुलाई न्यानो बनाएर राख्ने, बाथलाई जाडोमा अलिकति नियन्त्रण गर्न जरुरी छ।
कस्तो अवस्थामा अस्पताल जाने, हामी कहाँ बाथरोगको लागि कस्तो उपचार व्यवस्था छ?
लक्षणहरु कुनै देखापरे भने, जोर्नी दुख्ने, सुन्निनेदेखि विभिन्न लक्षणहरु त्यस्तो देखियो भने चिकित्सककोमा जाने, बाथरोग विशेषज्ञकोमा जाने। समयमै राइट डाइनोसिस गरेको खण्डमा वा समयमै औषधि उपचार भयो भने बाथको उपचार प्रारम्भिक चरणमा भयो भने बाथलाई धेरै नियन्त्रण गर्न सकिन्छ।
बाथ यतिसम्म खतरनाक हुन्छ कि, त्यसले ज्यान जानसक्ने पनि हुनसक्छ। त्यसैले समयमै त्यसको डाइनोसिस गर्दा राम्रो हुन्छ। त्यसको लागि हामीले अल्का अस्तालमा बारम्बार अवेरनेश कार्यक्रमहरु गरिरहेका हुन्छौँ। त्यसमा मेडिकल क्याम्प, फ्रि क्याम्प, गरिरहेका हुन्छौँ र अहिले पनि अल्का अस्पतालमा नै नौ दिनको ठूलो क्याम्प गरिहेका छौँ। त्यसमा बाथमा विभिन्न परीक्षणहरु निःशुल्क गरिरहेका छौँ। साथै औषधि पनि। अहिले दोस्रो चरणको शिविर चलिरहेको छ।
बाथरोग भएका बालबालिका र वृद्धवृद्धाको हेरचाह कसरी गर्ने?
बाथ भनेको सानो बच्चादेखि बुढाबुढीसम्म जुनकुनै पनि एज ग्रुपमा लाग्न सक्छ। लक्षण देखियो भने समयमै उपचार गर्नुपर्छ। बच्नको लागि तातो, न्यानो गर्नुपर्छ। अर्को कुरा केही गरी कसैको तौल उमेरअनुसार भन्दा धेरै छ भने तौल ठीक बनाउने, स्वस्थ जीवनशैली अपनाउने, खानाहरु र डाइटहरुमा नियन्त्रण गर्ने गर्नुपर्छ। बाथ लाग्यो भनेर गेडागुडीदेखि सबै बार्ने हाम्रो जुन गलत सोचाइ छ, त्यो नगरी पहिला कुन बाथ हो त्यो पत्ता लगाउने र विशेषज्ञको सल्लाहअनुसार अघि बढ्नुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
