काठमाडौं- विश्व सरसफाइ अभियन्ताहरुले एक महिने रानीपोखरी सरसफाइ अभियान सुरु गरेका छन्। पुस ४ गतेदेखि माघ ४ गतेसम्म अभियन्ताहरुले एक महिने रानीपोखरी सरसफाइ अभियान सुरु गरेका हुन्।
रानीपोखरी, भोटाहिटी, महेन्द्र सालिक र जमल चोक वरपरका क्षेत्रमा अभियन्ताहरुले दिनको तीन पटकसम्म सरसफाइ कार्यक्रम सञ्चालन गरिएको विश्व सरसफाइ अभियन्ता राजमान मानवले जानकारी दिए। उनले २०१५ सालमा महानगरपालिका बनेदेखि काठमाडौं उपत्यकाको फोहरको व्यवस्थापन महानगरले गर्ने भनिए पनि त्यस अनुसारको काम नभएको भन्दै काठमाडौं उपत्यका सफाइ अभियान समूहको समन्वयमा रानीपोखरी वरपरका क्षेत्रहरु सफा गर्न लागिएको बताए। अभियन्ता मानवले बिहान ६ देखि ९ बजे, ११ देखि ४ बजेसम्म र राति ८ देखि ११ बजेसम्म गरी दिनमा तीन पटक एक महिने अभियान सुरु गरेको बताए।
‘काठमाडौं भ्यालीलाई २०१५ सालदेखि यो ठाउँमा नगरपालिका बनेदेखि सफाइको जिम्मेवारी महानगरपालिकाले पाएको हो। त्यसबेलादेखि अहिलेसम्म काठमाडौं सफा भएको छैन। त्यसकारण यसलाई हामी सबैले यो हाम्रो मेथर्डलाई अब चेञ्ज गर्नुपर्छ। मूल्यांकन गरौँ। भन्ने सोचका साथ २०६७ भाद्रबाट विश्वका र नेपालको विभिन्न फोहोर सहरहरु बढारेर हिँडेका छौँ। हामी पुस ४ गतेदेखि माघ ४ गते एकमहिनासम्म काठमाडौं उपत्यका सफाइ अभियान समूहको समन्वयमा बिहान ६ देखि ९ बजेसम्म र १२ जनासम्मले बढार्ने र त्यसपछि फेरि ११ देखि ४ बजेसम्म फोहोर नगरौँ अभियान सुरु गरेका हौँ। त्यसपछि फेरि राति ८ देखि ११ बजेसम्म रानीपोखरी, जमलको वरिपरिका बाटो र पेटीमा दिनको तीन पटक सफा गर्ने अभियान सुरु गरेका छौँ,’ उनले भने।
अभियन्ता मानवले काठमाडौं यति धेरै अव्यवस्थित र फोहोरी कसरी भयो भन्ने बारेमा छलफल गरेर सरसफाइका कार्यक्रमलाई अघि बढाउनुपर्ने बताए।
यता काठमाडौं महानगरपालिकाले रानीपोखरी सर्वसाधरणका लागि खुल्ला गर्ने तयारी गरेको छ। केही साना संरचना निर्माणको काम सम्पन्न भएपछि छिट्टै खुल्ला गर्ने बताइएको छ।
रानीपोखरी आसपासको क्षेत्रमा भइरहेको निर्माण कार्य अन्तिम चरणमा पुगेको छ। रानीपोखरी प्रवेशद्वार, टिकट काउन्टर तथा शौचालयको निर्माण कार्य भइरहेको छ। रानीपोखरी प्रवेशका लागि जमल क्षेत्रमा प्रवेशद्वारसँगै फल्चाको पनि निर्माण कार्य भइरहेको छ। यस्तै, शान्तिवाटिका क्षेत्रमा गोलघर सहितका फल्चाहरुको निर्माण कार्य अन्तिम चरणमा पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
