नवलपरासी– नवलपुरमा राष्ट्रियस्तरको ‘भेट्रान्स कप फुटबल प्रतियोगिता’ आयोजना हुने भएको छ। अंग्रेजी नयाँ वर्ष, माघेसंक्रान्ति तथा माघी पर्वको अवसर पारेर जिल्ला फुटबल संघ नवलपुरको समन्वय, रिटर्नी माइग्रेन्ट्स नेपाल नवलपुर शाखाको आयोजना, टाइगर क्लब गोछडाको सहआयोजनामा यही पुस १७ गतेबाट फुटबल प्रतियोगिता हुन लागेको हो।
प्रतियोगितामा देशभरबाट १२ टिमको सहभागिता रहने जिल्ला फुटबल संघ नवलपुरका अध्यक्ष सेतमान पुनले बताए। नवलपरासीपूर्व नवलपुर र पश्चिम नवलपरासीसहित काठमाडौं, पोखरा, हेटौँडा, चितवन, सुर्खेत, वीरगञ्जलगायतका गरी १२ टिमले सहभागिता जनाउने उनले बताए। प्रतियोगिताको फाइनल खेल भने पुस २४ गते हुनेछ।
प्रतियोगितामा विजेता हुने टिमले १ लाख र उपविजेता हुने टिमले ५१ हजार रुपैयाँसहित ट्रफी तथा मेडल प्राप्त गर्नेछ । उत्कृष्ट गोलकर्ता, उत्कृष्ट खेलाडीलाई समेत नगदसहित पुरस्कृत गरिने सहआयोजक क्लबका सल्लाहकार पुष्परत्न महतोले बताए।
प्रतियोगिता सम्पन्न गर्न करिब ६ लाख रुपैयाँ खर्च लाग्ने अनुमान गरिएको छ। प्रतियोगिता सञ्चालनका लागि विभिन्न स्थानीय तह, वैदेशिक रोजगारीमा रहेका नेपाली तथा सामाजिक व्यक्तित्व एवं संघसंस्थाले आर्थिक सहयोग गरेको उनले जानकारी दिए।
जिल्लामा राष्ट्रियस्तरको खेल गर्दा पर्यटन प्रवद्र्धनमा समेत टेवा पुग्ने विश्वास लिइएको अध्यक्ष पुनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
