काठमाडौं– सहिद स्मारक ‘ए’ डिभिजन लिगको उपाधि दावेदार मनाङ मस्र्याङ्दी क्लबलाई हराउँदै मछिन्द्र फुटबल क्लब अंक तालिकाको शीर्ष स्थानमा उक्लिएको छ।
त्रिपुरेश्वरस्थित दशरथ रंगशालामा भएको रोमाञ्चक र प्रतिस्पर्धात्मक खेलमा मछिन्द्रले मनाङलाई १–० गोल अन्तरले पराजित गरेको हो। मछिन्द्रको जितमा एक मात्रै निर्णायक गोल सुनिल बलले गरे।
पहिलो हाफमा दुवै टोलीले केही अवसर सिजर्न गरेपनि सदुपयोग हुन नसक्दा गोलरहित बराबरीमा सकिएको थियो।
खेलको तेस्रो मिनेटमा एडिलाजा सोमिडेको ओभरहेड किक पोस्ट नजिकैबाट बाहिरियो। २५औं मिनेटमा विशाल राईको फ्रिकिकमा ओमोलाजा नुरेन करिमको प्रहार सदुपायोग हुन नसक्दा मछिन्द्रले अग्रता लिन चुक्यो।
३९औं मिनेटमा नुर्लान नोभ्रुजोभले गरेको प्रहार दोस्रो बार च्याप्दै पोस्टबाट थोरै बाहिरिएको थियो।
मनाङले दोस्रो हाफमा केही खेलाडी परिवर्तन गर्दै आफ्नो नयाँ रणनीति अपनाएको थियो। तर, उक्त रणनीति भने सफल हुन सकेन। ५८औं मिनेटमा सुनिलको क्रसमा विशाल राईले हेडर सदुपयोग गर्न सकेनन्।
६४औं मिनेटमा सुनिलको लामो प्रहारलाई गोलरक्षक विशाल सुनारले मुस्किलले बचाउँदा रिवाउन्डमा सुनिल कै प्रहार डिफ्लेक्ट हुँदा गोलरक्षकले सहजै नियन्त्रणमा लिन सफल भए।
९०औं मिनेटमा सुनिलले फ्रिकिकमा दर्शनीय गोल गर्दै मछिन्द्रलाई १–० को जित दिलाए। जितसँगै मछिन्द्रको ५ खेलमा १४ अंक पुगेको छ। साथै, मछिन्द्रले एएफसी कप छनोट खेल्न बलियो दाबेदारी प्रस्तुत गरेको छ।
सातौं चरणको समाप्तिमा शीर्ष स्थानमा रहने टोलीले नेपालको प्रतिनिधित्व गर्दै एएफसी कप छनोट खेल्ने हुनाले पनि यो खेलको महत्व थियो। पराजित मनाङ ६ खेलमा १३ अंकसहित दोस्रो स्थानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
