फाइल तस्बिर
काठमाडौं– नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले केन्द्रीय पदाधिकारीको संख्या १५ बनाउने प्रस्ताव अगाडि सारेका छन्। शुक्रबार पार्टी कार्यालय पेरिसडाँडामा बसेको स्थायी समितिको बैठकमा उनले उक्त प्रस्ताव राखेका हुन्।
बैठकमा सहभागी स्थायी समिति सदस्य शक्तिबहादुर बस्नेतले प्रचण्डको प्रस्तावबारे भोलि बस्ने स्थायी समितिको बैठकले निर्णय गर्ने बताए।
‘बैठकमा प्रचण्ड कम्रेडले १५ पदाधिकारी बनाऔं भनेर प्रस्ताव गर्नुभएको हो। कुन पदमा कति जना भन्ने विषयमा भोलि (शनिबार) बस्ने स्थायी समितिले निर्णय गर्नेछ,’ उनले भने,‘ पदाधिकारीमा अध्यक्ष, उपाध्यक्ष, महासचिव, उपमहासचिव, सचिव र कोषाध्यक्ष हुने छन्। त्यसमा कुन पदमा कति हुने भोलि प्रस्ताव हुन्छ।’
शुक्रबारको बैठकमा केही नेताहरुले भने ७ जना रहने गरी वरिष्ठ उपाध्यक्ष पद राख्ने पनि प्रस्ताव गरेका थिए। तर, उक्त प्रस्तावबारे भने खासै छलफल नभएको अर्का एक स्थायी समिति सदस्यले जानकारी दिए।
पार्टीले पदाधिकारीबारे खाका तयार गर्न स्थायी समिति सदस्य देव गुरुङको संयोजकत्वमा पाँच सदस्यीय कार्यदल बनाएको थियो। त्यही कार्यदलले भोलि पदाधिकारीको खाका प्रस्तुत गर्नेछ।
यस्तै, राष्ट्रिय सम्मेलनबाट फाइनल भएर पदाधिकारी चयन हुनेछन्। स्थायी समितिमा तत्कालीन नेकपामा प्रचण्ड समूहबाट १९ जना (तत्कालीन सभामुख कृष्णबहादुर महरा बाहेक) थिए। ४ जना एमाले प्रवेश गरेपछि हाल (महरासहित) १६ जना स्थायी समितिमा छन्। केन्द्रीय समितिमा १७८ जना छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
