काठमाडौं– काठमाडौंको बालुवाटारस्थित ललितानिवासको सरकारी जग्गा व्यक्तिका नाममा नामसारी गरेको मुद्दामा विशेष अदालतको आदेशले थुनामा रहेका मुख्य अभियुक्त शोभकान्त ढकालमाथि प्रहरीको केन्द्रीय अनुसन्धान ब्यूरो (सीआईबी)ले थप ७ अभियोगमा अनुसन्धान थालेको छ। सोभाकान्तसँग बयानका लागि भनेर सीआईबीले विशेष अदालतबाट पुस ७ र ९ गतेको 'समय'का लागि अनुमति पाएको छ।
सीआईबी स्रोतका अनुसार ढकालमाथि ठगी, सम्पत्ति शुद्धीकरण लगायतका कसूरमा अनुसन्धान हुन लागेको हो। ढकालसँग बयानका लागि विशेष अदालतका न्यायाधीशहरु अब्दुल अजिज मुसलमान र नित्यानन्द पाण्डेको बिहीबारको इजलासले सीआईबीलाई अनुमति दिएको हो।
उनीमाथि गलत लिखत तयार गरेको, सरकारी जग्गा किर्ते गरेको, ठगी, गुठीको जग्गा विभिन्न चार वटा मितिमा व्यक्तिको नाममा बनाएको, सम्पत्ति शुद्धीकरण लगायतका कसूरमा अनुसन्धान गर्न बयानका लागि भन्दै सीआईबीले विशेष अदालतबाट अनुमति पाएको हो।
विशेष अदालतका प्रवक्ता दिपेन्द्रनाथ अधिकारीले थुनामा रहेका अभियुक्त ढकाललाई बयानका लागि अनुमति माग गर्दै सीआईबीले निवेदन दिएपछि अदालतले मंगलबार र बिहीबार २ दिन सुनुवाई गरेर अनुमति दिएको बताए। बयानपछि प्रहरीले विभिन्न अभियोगमा थप अनुसन्धान गर्दै सरकारी वकिलको कार्यालयलाई अनुसन्धान प्रतिवेदन बुझाउने छ।
के छ ढकालविरुद्ध अभियोग?
ललिता निवासको ११३ रोपनी सरकारी जग्गा कीर्ते गरी व्यक्तिको नाममा नामसारी गरेको अभियोगमा अख्तियार दुरुपयोग अनुसन्धान आयोगले ४ जना पूर्वमन्त्रीसहित ११० जनाविरुद्ध २२ माघ २०७६ मा विशेष अदालतमा भ्रष्टाचार मुद्दा दायर गरेको थियो। अख्तियारकै पूर्वप्रमुख आयुक्त, भूमिसुधार तथा मालपोतका कर्मचारी, जग्गा खरिद–बिक्री गर्नेहरूविरुद्ध पनि मुद्दा दायर भएको थियो।
मुद्दा दायर गरिएकामा नेपाली कांग्रेसका नेता विजयकुमार गच्छदार तथा भाटभटेनी डिपार्टमेन्टल स्टोरका सञ्चालक मिनबहादुर गुरुङसमेत थिए। विशेष अदालतले उनीहरूलाई २०७६ फागुनमा अदालतमा उपस्थित हुन म्याद जारी गरेको थियो। तर, पछि कोरोना भाइरसको संक्रमण बढेका कारण लकडाउन जारी हुँदा अदालत समेत बन्द भयो।
पहिलो चरण (२०७६ चैतदेखि)को लकडाउन खुकुलो भएर अदालत खुल्न थालेपछि केही आरोपी अदालतमा उपस्थित भएपनि गच्छदारसहितका केही ‘भीआईपी’ भने उपस्थित भएका थिएनन्। जग्गा प्रकरणका मुख्य अभियुक्त ढकाल अदालतबाट म्याद जारी भएको एक वर्षपछि २०७७ माघ २८ गते विशेष अदालत उपस्थित भएका थिए। वयानपछि थुनछेक आदेश जारी गर्दै विशेष अदालतले उनलाई मुद्दाको पुर्पक्षका लागि थुनामा राख्न भनेको थियो।ललिता निवासको ११३ रोपनी जग्गा प्रकरणमा विशेषले तीन जना अभियुक्तलाई मात्र पुर्पक्षका लागि थुनामा पठाएको थियो।
न्यायाधीशहरू अब्दुल अजिज मुसलमान, बालेन्द्र रूपाखेती र चन्द्रबहादुर सारूको संयुक्त इजलासले ढकाललाई थुनामा पठाउने आदेश गरेको थियो। ढकाल र रामकुमार सुवेदीले संयुक्तरूपमा उक्त जग्गा व्यक्तिको बनाउने कार्यमा मुख्य बिचौलियाको भूमिका निभाएको आरोप अख्तियारको अभियोगपत्रमा रहेको छ। सुवेदी लेखापढी व्यवसायीसमेत भएकाले उनको सहयोगमा चलखेल गरेका थिए।
उनीहरूले समीरजङ कम्पनीका नामबाट व्यक्तिको नाममा मोही कायम गराउँदै सरकारी जग्गा व्यक्तिको बनाएको आरोप थियो। ललिता निवास प्रकरणमा छानविन र बयान गर्दा अधिकांश प्रतिवादीहरूले ढकालको नाम लिएका थिए। ढकालले आफू, श्रीमती, छोरा र छोरीको नाममा समेत बालुवाटारको जग्गा राखेको पाइएको थियो। उनले उक्त जग्गा राखेर आईएमई इन्स्टिच्युसनबाट १ करोड ९० लाख रूपैयाँ ऋण समेत लिएका थिए। त्यस्तै सोही स्थानको सन्दीप ढकालका नामको जग्गा राखेर यती विकास बैंकबाट ४९ लाख रूपैयाँ ऋण लिइएको पाइएको थियो।
आयोगले विशेषमा दायर गरेको अभियोग पत्रमा शोभाकान्तकी श्रीमती उमासँग ९१ लाख २० हजार र शोभाकान्तसँग २९ करोड २७ लाख ९८ हजार रूपैयाँ विगो मागदाबी गरिएको छ।
ढकालले नै नेकपा एमालेका उपाध्यक्ष विष्णुप्रसाद पौडेलका छोरालाई जग्गा बिक्री गरेका थिए। यो प्रकरणमा ढकालसँग पौडेलसमेत जोडिए पनि उनीविरुद्ध मुद्दा दायर भएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
