काठमाडौं- सहिद स्मारक ‘ए’ डिभिजन लिग फुटबलमा विभागीय टोली एपीएफ क्लब र न्यूरोड टिम (एनआरटी)ले रोमाञ्चक बराबरी खेल्दै अंक बाडेका छन्।
त्रिपुरेश्वरस्थित दशरथ रंगशालामा शुक्रबार सम्पन्न दिनको पहिलो खेलमा एपीएफ र एनआरटीले ३-३ गोलको बराबरी खेलेका हुन्।
खेलमा एनआरटीका लागि दर्शन गुरूङले दुई गोल गरे भने क्यामरुनका खेलाडी मेसुके ओलामेउले एक गोल गरे। यता, एपीएफका लागि आशिष लामाले दुई तथा दिपेश धिमालले एक गोल गरे।
खेलमा सुरुआती अग्रता भने एनआरटीले लिएको थियो। तर, एपीएफले एनआरटीका डिफेन्डरले गरेको गल्तीको फाइदा उठाउँदै पहिलो हाफमा बराबरी गोल फर्कायो।
३२औं मिनेटमा दर्शनले गोल गर्दै एनआरटीलाई सुरुआती अग्रता दिलाए। उनले मेसुके ओलोमोउको क्रसमा अनमार्कमा रहेका दर्शनले हेडरमार्फत् गोल गरेका थिए।
तर, खेलको ३७ औं मिनेटमा एपीएफ खेलमा फर्कियो। प्रदिप लामाको क्रसमा एनआरटीका डिफेन्डरको गल्तिको फाइदा उठाउँदै आशिषले हेडरमार्फत् गोल गरेर खेल १-१ को बराबरीमा ल्याए।
दोस्रो हाफमा एनआरटीले दुईपटक अग्रता बनाएपनि एपीएफले उत्कृष्ट पुनरागमन गर्दै खेल बराबरीमा सक्कायो।
४८औं मिनेटमा दर्शनले व्यक्तिगत दोस्रो गोल गर्दै एनआरटीलाई २-१ को अग्रता दिलाए। रञ्जन विष्टको पासमा उनले बललाई जाली चुमाए।
खेलको ६१औं मिनेटमा मेसुकेले गोल गरेपछि एनआरटी ३-१ ले अघि रह्यो। मेसुकेको प्रहारलाई किपरले क्लियर गर्न नसक्दा एनआरटीले खेलमा पुनः अग्रता बनायो।
६५ औं मिनेटमा एपीएफका दिपेश धिमालले गोल गर्दै खेल ३-२ को स्थितिमा ल्याए। कप्तान नविन लामाको फ्रिकिक प्रहार दिपेशले सहजै गोलमा परिणत गरे।
आशिषलाई एनआरटीका विक्रम धिमालले फाउल गरेपछि एपीएफले फ्रिकिक प्रहार गर्ने मौका पाएको थियो।
६९औं मिनेटमा आशिषले व्यक्तिगत दोस्रो गोल गर्दै खेललाई ३-३ गोलको बराबरीमा ल्याउदै एपीएफलाई हारबाट जोगाए। नविन लामाको क्रममा आशिषले गोल गरेका थिए।
बराबरीसँगै एपीएफले ६ खेलमा ५ अंक जोडेको छ।एनआरटीले ६ खेलमा ७ अंक जोडेको छ। एनआरटी छैटौं स्थानमा छ भने एपीएफ ११औं स्थानमा उक्लेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
