काठमाडौं– नेपाली कांग्रेसका नेता रामचन्द्र पौडेलले आफ्नो राजनीतिक यात्रा जारी रहेको बताएका छन्। पार्टीको १४औं महाधिवेशनमा मतदानबाट अलग रहेका पौडेलले आफ्नो उक्त कदम राजनीतिक यात्रामा अल्पविराम मात्रै भएको बताएका छन्।
१४औं महाधिवेशनबाट निर्वाचित पार्टी सभापति, पदाधिकारी तथा केन्द्रीय सदस्यहरुलाई बधाई दिँदै पौडेलले एक वक्तव्यमा आफ्नो राजनीतिक यात्रा जारी रहेको अविछिन्न अगाडि बढिरहने आफ्नो संकल्प रहिरहने बताएका छन्।
'प्रजातान्त्रिक समाजवादको सैद्धान्तिक मार्गको अनुशरण गर्दै मैले पार्टीभित्र एकताको सन्देश दिने प्रयत्न गरेको हुँ। मेरा साथीहरुले 'रामचन्द्रजीले अब पार्टीभित्रको चुनाव लड्नु हुँदैन, जोगिएर रहनुपर्छ' भनेको हुनाले प्रतिस्पर्धाबाट नै अलग रहने निर्णयमा पुगेँ र त्यस निर्णयप्रति इमान्दार रहन मतदानबाटै अलग रहेँ,' पौडेलले भनेका छन्, 'यसरी अलग बस्नु राजनीतिक यात्रामा विश्राम होइन, केही क्षणको अल्पविराम मात्र हो। मेरो राजनीतिक यात्रा जारी छ र अविछिन्न अगाडि बढिरहने मेरो संकल्प रहिरहने छ।'
आम कार्यकर्ता, शुभचिन्तक र जनसमुदायले आफूप्रति गरेको विश्वासको सदैव सम्मान र कदर गर्ने पनि पौडेलको भनाइ छ।
पौडेलले १४औं महाधिवेशनबाट पार्टीको विभिन्न जिम्मेवारीमा निर्वाचित भएका नेताहरुलाई पार्टीका सबै नेता/कार्यकर्ताको भावना र मर्मलाई नबिर्सिन आग्रह समेत गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
