काठमाडौं– गृहमन्त्री बालकृष्ण खाणले राष्ट्रिय पुनर्निमाण प्राधिकरणले २०७२ सालको भूकम्पबाट क्षति भएका संरचना पुनर्निमाणमा महत्वपूर्ण कार्य सम्पादन गरेको बताएका छन्। बिहीबार सिंहदरबारमा आयोजित राष्ट्रिय पुनर्निमाण प्राधिकरण हस्तान्तरण तथा बर्हिगमन कार्यक्रममा बोल्दै गृहमन्त्री खाणले प्राधिकरणले ६ वर्षे कार्यकालमा अन्तर्राष्ट्रिय क्षेत्रका प्राज्ञले समेत अनुसन्धान गर्न योग्य काम गरेको बताए।
‘६ वर्षे कार्यकालमा २०७२ सालको भूकम्पले क्षति पुर्याएका संरचना निर्माणमा महत्वपूर्ण कार्यसम्पादन राष्ट्रिय पुनर्निमाण प्राधिकरणले गरेको छ,’ गृहमन्त्री खाणले भने, ‘प्राधिकरणको काम यससम्बन्धमा अध्ययन, अनुसन्धान गर्ने अन्तर्राष्ट्रिय प्राज्ञलाई पनि काम लाग्छ।’
भूकम्पले क्षति पुर्याएका भौतिक संरचना, पुरातात्विक महत्वका संरचनाको निर्माण ज्यादै जटिल र चुनौतीपूर्ण भएपनि प्राधिकरणले मन लगाएर पूरा गरेको भन्दै गृहमन्त्री खाणले सरकार र नेपाली जनताको तर्फबाट प्राधिकरणलाई धन्यवाद दिए। ‘भूकम्पले भत्काएका भौतिक संरचना, पुरातात्विक संरचनाको निर्माण ज्यादै जटिल र चुनौतीपूर्ण थियो। त्यो काम प्राधिकरणले छोटो समयमा मन लगाएर पूरा गरेको छ,’ मन्त्री खाणले भने, ‘प्राधिकरणले गरेको नागरिकलाई राहत हुने यो काम सहजै आकलन गर्न सकिने खालको थिएन। तर, प्राधिकरणले पूरा गरेको छ।’
मन्त्री खाणले गृह मन्त्रालय मातहतको विपद् जोखिम न्यूनीकरण तथा व्यवस्थापन प्राधिकरणले अब पुनर्निमाण प्राधिकरणले गरेका कामको प्राविधिक र प्रशासनिक काम र सुरु भएर सम्पन्न हुन नसकेका कार्यको पनि परामर्श गरेर टुंग्याउन लाग्ने बताए। पुनर्निमाणको अहिलेसम्मको सेवा र दक्षतालाई समेत उपयोग गरेर प्राधिकरण अघि बढ्ने उनको भनाइ थियो।
‘पुनर्निमाणको अहिलेसम्मको सेवा र दक्षतालाई उपयोग गरेर सदुपयोग गर्दै कसरी अगाडि बढ्ने भन्ने जिम्मेवारी विपद जोखिम न्यूनीकरण तथा व्यवस्थापन प्राधिकरणको काँधमा आएको छ,’ खाणले भने, ‘प्राविधिक र प्रशासनिक काम मात्रै होइन, सुरु भएका राम्रा कामलाई पनि निरन्तरता दिनुहोला।’
पुनर्निमाण प्राधिकरणले २०७२ पुस १० गते काम सुरु गरेको थियो। पुनर्निमाण प्राधिकरणले आफ्नो जिम्मेवारी सहरी विकासमन्त्रालय र विपद जोखिम न्यूनीकरण तथा व्यवस्थापन प्राधिकरणलाई हस्तान्तरण गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।