काठमाडौं– अन्तर्राष्ट्रिय अपराधी चार्ल्स शोभराज बन्दी प्रत्यक्षीकरणको निवेदन लिएर फेरि सर्वोच्च अदालत पुगेका छन्। विदेशी नागरिकको नेपालमा हत्या गरेको अभियोगमा केन्द्रीय कारागार जगन्नाथदेवलमा थुनामा रहेका शोभराज आफू कैद अवधि भुक्तानी भएको दाबी गर्दै सर्वोच्च पुगेका हुन्।
शोभराजका तर्फबाट पुस ७ गते बुधबार बन्दीप्रत्यक्षीकरणको रिट निवेदन दायर भएको हो। उनको रिटमा बिहीबार पेसी तोकिएको छ। न्यायाधीश अनिलकुमार सिन्हाको इजलासमा पहिलो नम्बरमा शोभराजको मुद्दा पेसी तोकिएको छ। आज हुने सुनुवाइले उनको निवेदनमा सुनुवाइ गर्ने कि नगर्ने निर्णय गर्ने छ।
शोभराजले आफू रिहा हुनुपर्ने दाबी गर्दै रिट दायर गरेको पहिलोपटक भने हैन। यसअघि पनि उनी पटक–पटक सर्वोच्च पुग्ने गरेका थिए। उनले कहिले जेष्ठ नागरिकको हक पाउनुपर्ने दाबी गर्ने गरेका छन् भने कहिले कारागार ऐन अनुसारको सुविधा पाउनुपर्ने दाबी गर्दै आएका छन्। तर, अदालतले उनको माग हरेक पटक अस्वीकार गर्दै आएको छ।
नेपालको जेलमा रहेका कुख्यात विकिनी किलर शोभराज पछिल्लोपटक २०७८ असोज १८ गते सर्वोच्च अदालतमा बन्दीप्रत्यक्षीकरणको निवेदन लिएर पुगेका थिए। न्यायाधीश मीरा खड्काको एकल इजलासले कैफियत प्रतिवेदन माग गर्ने आदेश गरेर थन्काएको थियो। यो आदेशलगत्तै देशभरका अदालत बडादशैंका कारण बिदा भएका थिए।
उनले आफूलाई गैरकानुनी रुपमा थुनामा राखेको दाबी गर्दै दिएको निवेदन सर्वोच्च प्रशासनले नै दरपिठ गरिदिएपछि उनी इजलासमा पुगेका थिए। उक्त निवेदन दर्ता हुने भएपछि उनले नयाँ निवेदन दिएका हुन्। सर्वोच्चले उनको दाबीमा सुनुवाइ गर्दै रिहाइ गर्ने आदेश गर्ने सम्भावन भने न्यून रहेको छ।
कैद छुटको माग गर्दै २०७६ कात्तिक २१ गते शोभराज सर्वोच्च अदालत पुगेका थिए। कारागार नियमावलीको प्रावधानमा विदेशी नागरिकले पनि बिना भेदभाव छुट पाउनुपर्ने मागसहित शोभराज सर्वोच्च पुगेका थिए। कुनै पनि अपराधका कसूरदार भएपनि ७० वर्ष उमेर कटेपछि ७५ प्रतिशतसम्म कैद छुट दिन सकिने नियमावलीको व्यवस्था आफूलाई पनि लागू हुने मागसहित उनले रिट दायर गरेका थिए।
सन् १९४४ मा भियतनाममा जन्मिएका शोभराजका बाबु भारतीय मूलका हुन्। पछि उनलाई आमाका प्रेमीले हुर्काएका थिए। उनले अपराध यात्रा सन् १९६३ मा १९ वर्षको उमेरबाट सुरु भएको थियो। त्यसबेला उनले पेरिसको एक घरमा चोरी गरेका थिए। त्यसबेला पक्राउ परेका उनले झण्डै एक वर्ष जेल जीवन बिताए। जेलमा त्यहाँको अन्डरवर्ल्ड समूहका सदस्य फिलिक्स इसकोन्जीसँग उनको चिनजान भयो।
जेलबाट छुटेपछि शोभराजले उनकै समूहमा आबद्ध भएर अपराध मच्चाउन थाले। त्यसबेला उनले अपराधभन्दा पनि सूचना संकलनको काम गरेको बताइन्छ। त्यसपछि उनले पेरिसमा चोरी आतंक मच्चाए। सो क्रममा प्रहरीले निगरानी थालेपछि उनले पेरिस नै छाडे।
त्यसपछि उनी पूर्वी युरोप हुँदै सन् १९७० मा भारत आए। मुम्बईमा उनी कार चोर्ने र बेच्ने गर्थे। भारतको मुम्बईस्थित होटल अशोकामा चोरी गरेकै कारण पक्राउ परेका उनी छुटेपछि अफगानिस्तान छिरेका थिए। त्यहाँ पनि उनी समातिएका थिए। तर, बिरामी परेको नाटक गरेर अस्पतालबाटै फरार भएका उनी इरान, टर्की हुँदै ग्रिसतिर हान्निए। ती देशमा चोरी र लुटपाट आतंक मच्चाएपछि थाइल्यान्ड पुगे। त्यहाँ त उनले तीन जना पर्यटकको हत्या नै गरे।
हत्या गरिएका तीन जना पर्यटकको राहदानी बोकेर उनले काठमाडौंको यात्रा तय गरे। नेपाल आएका उनले यहाँ पनि विदेशी पर्यटकको हत्या गरे। २०३२ पुस ६ गते क्यानेडियन नागरिक लोरेन्ट क्यारियरको हत्या गरेर शव टुक्रा पारी भक्तपुरको मनोहरा खोलामा फालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
