काठमाडौं– नेकपा माओवादी केन्द्रले सुदूरपश्चिम र लुम्बिनी प्रदेश अध्यक्षसहित पदाधिकारी राष्ट्रिय सम्मेलनपछि मात्रै चयन गर्ने तयारी गरेको छ। केन्द्रीय समितिमा जानेको नाम फाइनल भएपछि प्रदेश पदाधिकारी चयन गर्न सजिलो हुने माओवादीको आकलन छ।
सुदूरपश्चिम र लुम्बिनी प्रदेशले प्रदेश समिति बनाउनुका साथै राष्ट्रिय सम्मेलनमा सहभागी हुने प्रतिनिधिको समेत चयन गरेर पठाइसकेका छन्। सुदूरपश्चिम प्रदेशमा २ सय २३ जना प्रदेश समिति चयन गर्नुका साथै ८३ जना राष्ट्रिय सम्मेलनका लागि पठाएको प्रदेश सदस्य ओमविक्रम भाटले बताए।
‘सुदूरपश्चिम प्रदेशले प्रदेश समिति बनाएर शपथ गरायो। राष्ट्रिय सम्मेलनमा सहभागी हुनेको नाम फाइनल गर्यो’ भाटले भने, ‘राष्ट्रिय सम्मेलनपछि प्रदेश पदाधिकारी चयन गर्ने भनियो। पदाधिकारीका विषयमा प्रदेश समितिमा छलफल नै नगरेर सकियो।’
सुदूरपश्चिम प्रदेश अध्यक्ष दाबी गरेका धेरै केन्द्रीय समितिमा परेपछि प्रदेशमा पदाधिकारी टुंगो लगाउन सजिलो हुने नेताहरुले बताएका छन्।
यस्तै, लुम्बिनी प्रदेश अध्यक्षमा सहमति हुन नसकेपछि २ सय १७ जना प्रदेश समिति घोषणा गरेर शपथ गराइएको छ। राष्ट्रिय सम्मेलनमा सहभागी हुने प्रतिनिधिको समेत चयन गरेर पठाइसकिएको केन्द्रीय सदस्य जीवन गौतमले बताए।
‘प्रदेश पदाधिकारीका विषयमा सामान्य छलफल भयो। सर्वसम्मत हुन सकेन। त्यसपछि प्रदेश समिति र प्रतिनिधि छनोट गरेर पठाएको छ’, गौतमले भने, ‘प्रदेश पदाधिकारी राष्ट्रिय सम्मेनलपछि मात्रै चयन हुने सम्भावना छ।’
तर, आन्तरिक रुपमा प्रदेश पदाधिकारीका विषयमा गृहकार्य भइरहेको गौतमको दाबी छ। लुम्बिनी प्रदेशबाट ९८ जना राष्ट्रिय सम्मेलनमा सहभागी हुने प्रतिनिधि चयन गरिएको छ। अरु मनोनित गर्नेको संख्या थपिने बताएको छ।
प्रदेश अध्यक्ष सुदर्शन बराल भएको चर्चा गरिएपनि प्रदेश समितिबाट अनुमोदन भइनसकेको केन्द्रीय सदस्य दीपेन्द्र पुनले बताए। यद्यपि, प्रदेश अध्यक्ष बराल नै हुने सम्भावना भने धेरै छ। प्रदेश अध्यक्षका लागि केन्द्रीय सदस्य हेमराज शर्मा ‘डाइमन’, दीपेन्द्र पुन र बराल आफैं दाबेदार थिए। अन्तिममा बराललाई नै अध्यक्ष बनाउने माटामोटी सहमति भएपनि घोषणा हुन सकेकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
