काठमाडौं- विभागीय टिम नेपाल एपीएफ फुटबल क्लबले सहिद स्मारक ‘ए’ डिभिजन लिगमा फ्रेन्ड्स क्लबलाई पराजित गरेको छ।
त्रिपुरेश्वरस्थित दशरथ रंगशालामा सोमबार भएको खेलमा एपीएफले फ्रेन्ड्सलाई ३-१ गोलले हराउँदै जारी लिगमा पहिलो जित हात पारेको हो।
एपीएफका लागि आशिष लामाले दुई तथा विकी तामाङले एक गोल गरे। फ्रेन्ड्सका प्रिजेन तामाङले एक गोल फर्काए।
खेलको सुरूआतिदेखि नै आक्रामक खेल खेले पनि फ्रेन्ड्सले त्यसलाई कायम राख्न सकेन। फलस्वरूप एपीएफले विदेशी गोलरक्षकको लोभलाग्दो प्रदर्शन र पहिलो हाफको ३० मिनेटभित्रै दुई मिनेटको अन्तरमा दुई गोल गर्दै फ्रेन्ड्सलाई दबाबमा राखेको थियो।
पाँचौ मिनेटमा प्रिजेन तामाङको पासमा जमल एन्थोनी फ्रान्कोइसको 'वान भर्सेस वान'को प्रहारलाई एपीएफका जापनिज गोलरक्षक युया कुरियामाले अघि बढ्दै बचाए। १७औं मिनेटमा प्रिजेनको पेनाल्टी बक्सभित्रको प्रहारलाई गोलरक्षक युयाले डाइभ गर्दै बचाउँदा फ्रेन्ड्स अग्रता लिनबाट चुक्यो। खेलको २४औं मिनेटमा हरि कठायतले उत्कृष्ट गोल गरेका थिए। तर, अफसाइड रहेपछि उनको गोलले मान्यता पाएन।
३०औं मिनेटमा विकीले गोल गर्दै एपीएफलाई १-० को अग्रता दिलाए। नविन लामाको पासमा आशिष लामाले गरेको प्रहार फ्रेन्ड्सका सुरज विश्वकर्मालाई डिफ्लेक्ट भएको थियो। उक्त बलमा नविनले दिएको पासमा विकीको शक्तिशाली प्रहार क्रसबारमा लाग्दै गोलमा परिणत भएको थियो।
त्यसको दुई मिनेटपछि ३२औं मिनेटमा आशिषले गोल गर्दै एपीएफको अग्रता दोब्बर पारे। आशिषको प्रहार फ्रेन्ड्सका सुरजलाई डिफ्लेक्ट हुँदै गोलमा परिणत भएको थियो।
दोस्रो हाफमा फ्रेन्ड्सले सम्हालिएर खेल खेलेको थियो भने एपीएफ रक्षात्मक देखिएको थियो। यद्यपि, दोस्रो हाफमा दुवै टोलीबाट १/१ गोल निस्किएको थियो।
खेलको ५७औं मिनेटमा आशिषले व्यक्तिगत दोस्रो गोल गर्दै एपीएफलाई ३-० को अग्रता दिलाए। आवास लामिछानेको पासमा अफसाइड बिट गर्दै उनले सहजै गोल गरे।
६९औं मिनेटमा प्रिजेनले पेनाल्टीमा गोल गर्दै फ्रेन्ड्सलाई ३-१ को स्थितिमा ल्याए। एपीएफका दीपेश धिमालले पेनाल्टी एरियाभित्र जमुल एन्थोनीलाई फाउल गरेका थिए। उक्त फउलपछि फ्रेन्ड्सले पेनाल्टीको अवसर पाएको थियो। प्रिजेन्ट पेनाल्टीमा चुकेनन्।
७१औं मिनेटमा आशिषले ह्याट्रिक गोलको अवसर गुमाए। 'वान भर्सेस वान'को स्थितिमा पेनाल्टी एरियाभित्रबाट उनको प्रहार फ्रेन्ड्सका गोलकिपर राहुल रामचन्द्र यादवले बचाए।
दुवै टोली रेलिगेसन जोनमा रहेकाले यो खेल दुवै टोलीको लागि महत्त्वपूर्ण रहेको थियो। लिगको चौथो चरणको खेलसम्म फ्रेन्ड्सको दुई तथा एपीएफको तीन अंक छ। एपीएफले थ्रीस्टारलाई बराबरीमा रोक्दै लिगमा पहिलो अंक जोडेको थियो।
यता, फ्रेन्ड्सले सातदोबाटो युथ क्लब र थ्रीस्टारसँग बराबरी खेल्दै अंक जोडेको थियो। जितसँगै एपीएफ रेलिगेसन जोनलाई छाड्दै ११औँ स्थानमा उक्लिएको छ भने फ्रेन्ड्स १४औँ स्थानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
