फाइल तस्बिर।
काठमाडौं– मनाङ मर्स्याङ्दी क्लबले सहिद स्मारक ए डिभिजन लिगमा विभागीय टोली नेपाल पुलिस क्लबलाई पराजित गर्दै एएफसी कप छनोट खेल्ने सम्भवना बलियो बनेको छ।
शनिबार घरेलु मैदान पोखरा रंगशालामा सम्पन्न खेलमा मनाङले पुलिसलाई ३-१ गोलले पराजित गरेको हो। मनाङको जितमा अन्जन विष्टले २ गोल गरे भने अर्को गोल निशाल लिम्बुले गरे। पुलिसका लागि एक मात्र गोल पेनाल्टीमा सुमन लामाले फर्काएका थिए
खेलको १०औं मिनेटमा अन्जनको गोलबाट मनाङले अग्रता लिएको थियो। रक्षक दिनेश राजवंशीको लामो पासमा अञ्जनले पुलिसका गोलकिपर रोशन खड्का पेनाल्टी बक्स बाहिर निस्किएको मौकाको फाइदा उठाउँदै गोल गरे। अञ्जनको जारी लिगमा यो पहिलो गोल हो।
३५औं मिनेटमा पुलिसका लागि सुमन लामाले पेनाल्टी गोलमार्फत गोल गरेपछि पहिलो हाफ १–१ को बराबरीमा टुंगिएको थियो। मनाङका रक्षक सरोज योञ्जन लामाले डिबक्सभित्र पुलिसका फरवार्ड निरकुमार राईमाथि फाउल गरे। त्यसपछि पुलिसले पेनाल्टी पाएको थियो।
७३औं मिनेटमा अञ्जनले फ्रिकिकमार्फत दोस्रो गोल गर्दै टोलीलाई पुनः २-१ को अग्रता दिलाए। ८३औं मिनेटमा मनाङ ओलावालेले गरेको प्रहार पुलिसका गोलकिपर रोशनले फर्काएपछि सोही रिबाउन्ड बलमा निशान लिम्बुले भली गोल गर्दै खेल ३-१ मा टुंग्याए।
जितसँगै मनाङले अंक तालिकाको शीर्षस्थानमा २ अंकको अग्रता कायम गरेको छ। यस्तै, एएफसी कप खेल्ने सम्भावना बलियो बनाएको छ। सातौं चरणको खेल सकिँदा शीर्षस्थानमा रहने टोली एएफसी कप छनोट खेल्ने प्रावधान रहेको छ। अब दुई चरणको खेलको नतिजाले एएफसी कप छनोट खेल्ने टोली पक्का हुनेछ।
शुक्रबार दशरथ रंगशालामा साविक विजेता मच्छिन्द्र फुटबल क्लब र त्रिभुवन आर्मी फुटबल क्लबले अलग-अलग खेलमा बराबरी खेलेको थियो। उक्त खेलको नतिजाले मनाङलाई शीर्षस्थानमा उक्लने मौका दिएको थियो।
सातौं चरणको समाप्तीमा ४ क्लब मनाङ, मच्छिन्द्र, आर्मी र एपीएफ फुटबल क्लबमध्ये अंकतालिकाको माथि रहने टोलीले एएफसी कप छनोटमा नेपालको प्रतिनिधित्व गर्नेछ।
छैटौं चरणमा मच्छिन्द्रसँग खेल्नुअघि मनाङको १३ अंक पुगेको छ। मनाङले दुई अंकको स्पष्ट अग्रता लिएको छ। दोस्रो स्थानको मच्छिन्द्रको ११ र तेस्रो स्थानको आर्मीको ९ अंक छ। मनाङले सातौं र आठौं चरणका खेल पनि घरेलु मैदान पोखरा रंगशालामा नै खेल्नेछ। छैटौं चरणको खेलका लागि भने टोली काठमाडौं झर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
