काठमाडौं- पहिलोपटक मोफसलमा हुन लागेको सहिद स्मारक ‘ए डिभिजन लिग फुटबल’ को पहिलो खेलमा नेपाल पुलिस क्लबले आज (शनिबार) मनाङ मर्स्याङ्दी क्लबको सामना गर्दैछ। मनाङले पोखरा रङ्गशालालाई ‘होम ग्राउण्ड’ बनाएपछि पुलिस क्लब सहिद स्मारक लिगको पाँचौँ चरणको खेल खेल्न पोखरा पुगेको छ।
पोखराको मैदानमा मनाङ र पुलिस दुवै सफल टोली हुन्। आहा ! रारा गोल्डकप फुटबलमा यी दुई टोलीको गर्विलो इतिहास छ। आजको खेलमा पुलिस क्लबको तुलनामा मनाङलाई पोखरेलीको समर्थन बढी हुने सम्भावना छ।
दर्शकको साथ पाउने भएकाले पनि मनाङले पोखरालाई रोजेको हुनुपर्दछ। घरेलु फुटबलका यी दुई चर्चित क्लब शहीद स्मारक लिगको ६७ वर्षको इतिहासमा पोखराको मैदानमा उत्रिँदा तीन अङ्क जोड्ने ध्याउन्नमा हुनेछन्।
पोखरा रङ्गशालामा आज आयोजित ‘प्रिम्याच कन्फरेन्स’ मा दुवै टोलीका प्रशिक्षकले राम्रो फुटबल खेल्दै तीन अङ्क जोड्ने दाबी गरे।
जारी लिगमा चौथो चरणको समाप्तिसम्म मनाङ १० अङ्कसहित अङ्क तालिकाको दोस्रो स्थानमा छ । ‘लिग लिडर’ मछिन्द्रसँग समान अङ्क भए पनि गोल अन्तरमा मनाङ पछाडि छ । ‘होम ग्राउण्ड’मा पुलिस विरुद्धको खेल जितेर अङ्क तालिकाको पहिलो स्थानमा उक्लिने मौका मनाङलाई छ ।
पुलिस क्लब पनि मनाङको घरेलु मैदानमा उसलाई पराजित गरेर अङ्क तालिकामा माथि उक्लिन चाहन्छ । लिगमा पाँच अङ्कसहित आठौँ स्थानमा रहेको पुलिसलाई उपाधिको लक्ष्यमा कायमै रहन मनाङसँगको तीन अङ्क महत्वपूर्ण हुनेछ । विपक्षी टोलीको मैदानमा शतप्रतिशत नतिजा निकाल्दै अघि बढ्ने रणनीतिमा पुलिस क्लब छ ।
पुलिस क्लबका प्रशिक्षक अनन्तराज थापाले मनाङको ‘होम ग्राउण्ड’ भए पनि पोखराको मैदान आफूहरुका लागि ‘लक्की’ सावित हुँदै आएको बताए।
लिगको उपाधि दौडमा कायम रहनका लागि पनि मनाङसँगको खेल महत्वपूर्ण रहेको उनी बताउँछन्।
मनाङ क्लब पोखरेली दर्शकको साथ पाउने भएपछि उत्साहित छ। विगतमा मनाङको खेल हुँदा रङ्गशालामा दर्शक ओइरिने गरेका थिए। असी प्रतिशत दर्शकको समर्थक पाउने विश्वासमा मनाङ छ।
मनाङका प्रशिक्षक राजेन्द्र तामाङले राम्रो फुटबल खेलेर जित्ने योजनामा रहेको बताए। पुलिस बलियो प्रतिद्वन्द्वी रहेकाले कम आकलन नगरेको उनलर् बताए।
जारी लिगअन्तर्गत पोखरा रङ्गशालामा तीन खेल हुनेछन्। शनिबारको खेलपछि मनाङले पुस ११ गते ब्रिगेड ब्वाईज क्लबसँग र पुस २४ गते च्यासल युथ क्लबसँग यहाँ खेल्ने तालिका छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
