कांग्रेस महाधिवेशन : दोस्रो चरणको मतदानपछि मतपेटिका संकलन गरिँदै, ३ ठाउँमा मतगणना हुने

महाधिवेशन विशेष

नेपाल लाइभ मंगलबार, मंसिर २८, २०७८ २२:०७

काठमाडौं- नेपाली कांग्रेसको १४औँ महाधिवेशनअन्तर्गत सभापति पदका लागि दोस्रो चरणको मतदान सकिएसँगै मतपेटिका संकलन सुरु भएको छ। राष्ट्रिय सभा गृहमा दिउँसो ३:३० बजेदेखि सुरु भएको मतदान निर्धारित समयभन्दा डेढ घण्टा ढिला राति ९ बजे सम्पन्न भएको थियो।

मतदान सकिएलगत्तै मतपेटिकामा सिलबन्दी गरी गणनाका लागि संकलन गरिएको हो।

दोस्रो चरणको मतदानमा चार हजार ५६४ मत खसेको छ। यस महाधिवेशनमा कूल चार हजार ७४३ मतदाता रहे पनि करिब २०० मतदाता मतदानमा अनुपस्थित भएका छन्।

उक्त मतदानको मतगणना केही बेरमा सुरु हुने पार्टीको केन्द्रीय निर्वाचन समितिले जनाएको छ। मतगणना तीन ठाउँबाट हुने गरी तयारी गरिएको छ।

सोमबारको तुलनामा आजको मतगणना सुरु गर्दा कम समय लाग्ने बताइएको छ। मतपत्र एकै किसिमको मात्र रहेको, मतगणना आचारसंहिता र गणक तयारी अवस्थामा रहेकाले तुरुन्तै मतपेटिका शिलबन्दी गरी मुचुल्का बनाएर गणना सुरु गरिने समितिले जनाएको छ।

सोमबार भएको पहिलो चरणको निर्वाचनमा सभापति पदका प्रत्यासी कसैले पनि ५० प्रतिशतभन्दा बढी मत ल्याउन नसकेपछि पार्टी विधानअनुसार सबैभन्दा बढी मत ल्याउने प्रधानमन्त्री एवं वर्तमान पार्टी सभापति शेरबहादुर देउवा र नेता डा शेखर कोइरालाबीच दोस्रो चरणको मतदान भएको हो।

सोमबारको मतदानमा प्रधानमन्त्री एवं वर्तमान सभापति देउवाले दुई हजार २५८ र उनका निकटतम प्रतिद्वन्द्वी पार्टीका केन्द्रीय सदस्य डा कोइरालाले एक हजार ७०२ मत प्राप्त गरेका थिए।
सभापतिका अन्य प्रत्यासी पूर्वमहामन्त्री प्रकाशमान सिंहले ३७१, उपसभापति विमलेन्द्र निधिले २५० र केन्द्रीय सदस्य कल्याण गुरुङले २२ मत प्राप्त गरेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

ओलीको व्याख्या : जेन–जीले चलाउने सबै व्यवसाय स्टार्टअप

सहमतिका आधारमा संविधान संशोधनको प्रक्रिया थालिने

नीति तथा कार्यक्रममा उठेका सवालको जवाफ दिँदै प्रधानमन्त्री