नेपाल इन्फ्रास्ट्रक्चर बैंकले अब अन्तरबैंक कारोबार गर्नुपर्ने, लाभांशमा राष्ट्र बैंकको कडाइ

बैंक/बिमा/सेयर

नेपाल लाइभ सोमबार, मंसिर २७, २०७८ १४:५९

काठमाडौं- नेपाल राष्ट्र बैंकले नेपाल इन्फ्रास्ट्रक्चर बैंक (निफ्रा) लाई थप कडाइ गर्ने गरी निर्देशन जारी गरेको छ। राष्ट्र बैंकले निफ्रालाई जारी गरेको निर्देशन २०७५ मा संशोधन, परिमार्जन थप व्यवस्थामा यो बैंकको लाभांश वितरणमा कडाइ गर्ने जानकारी दिएको छ।

उक्त बैंकले नाफा-नोक्सान हिसाबमा लेखाङ्‍कन नभइ अन्य समग्र आम्दानीमार्फत् लेखाङ्‍कन हुने आय पछि अर्निङ रिटर्न (राखिएको कमाइ)मा लेखाङ्‍कन गर्नुपर्ने निर्देशनमा उल्लेख छ। लाभांश वितरण गर्ने गरी लेखाङ्‍कन हुँदा २० प्रतिशत रकम सामान्य रिजर्भमा जम्मा गर्नुपर्ने व्यवस्था पनि गरेको छ।

राष्ट्र बैंकले अन्तरबैंक कारोबार तथा सापटी सम्बन्धमा निफ्रालाई थप नयाँ व्यवस्था गरिदिएको छ। निफ्राले अन्य इजाजतपत्र प्राप्त बैंक तथा वित्तीय संस्थासँग गर्ने सापटी कारोबारलाई नियमित कर्जा सापटीको रूपमा नभइ अन्तरबैंक कारोबार/सापटीको रूपमा प्रयोग गर्न पाउने व्यवस्था राष्ट्र बैंकले गरेको छ। अन्तरबैंक सापटीको अवधि बढीमा सात दिनसम्म मात्र हुनेछ।

राष्ट्र बैंकले निफ्राको लागि जारी गरिएको निर्देशन २०७५ मा संशोधन र परिमार्जन तथा नयाँ व्यवस्था अनुसार ऋणीले पेस गरेको लिखित कार्य योजनामा पूर्वाधार विकास बैंक विश्वस्त भएमा कर्जालाई पुनर्तालिकीकरण वा पुनर्संरचना गर्नसक्ने व्यवस्था गरेको छ।

त्यसको लागि कर्जासम्बन्धी कागजात तथा सुरक्षण पर्याप्त भएको प्रमाण, कर्जा असुल हुने सम्भावनाबारे पूर्वाधार विकास बैंक विश्वस्त भएको आधार र कर्जालाई पुनर्तालिकीकरण वा पुनर्संरचना गर्न लिखित कार्ययोजना पेस गर्नुपर्ने व्यवस्था गरिएको छ।

अतिरिक्त त्यस्तो कर्जा पुनर्तालिकीकरण वा पुनर्संरचना गर्दाको दिनसम्म असुल हुन बाँकी ब्याजको कम्तीमा २५ प्रतिशत ब्याज रकम असुल उपर भएको हुनुपर्ने राष्ट्र बैंकले उल्लेख गरेको छ। कर्जा पुनर्तालिकीकरण वा पुनर्संरचना गरिएका स्पष्ट आधारहरु प्रत्येक कर्जा फाइलमा संलग्न हुनुपर्ने व्यवस्था गरेको छ।

कर्जा पुनर्तालिकीकरण वा पुनर्संरचना गर्दा असुल हुन बाँकी ब्याजलाई पुँजीकरण गर्न नपाइने व्यवस्था पनि गरिएको छ। असल वर्गमा वर्गीकरण भइरहेका कर्जालाई पुनर्संरचना वा पुनर्तालिकीकरण गर्दा न्यूनतम १२.५ प्रतिशत कर्जा नोक्सानी व्यवस्था गर्नुपर्ने छ।

राष्ट्र बैंकले कमसल, तथा खराब वर्गमा वर्गीकरण भइसकेका कर्जाहरुलाई पुनर्संरचना वा पुनर्तालिकीकरण गर्दा पूर्ववत् कायम गरिएको कर्जा नोक्सानी व्यवस्थामा लगातार दुई वर्षसम्म नियमित भएको अवस्थामाबाहेक कुनै समायोजन गर्न नपाइने व्यवस्था गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बनेका सबै सरकार बलिया नै हुन्छन् : महामन्त्री थापा

तीन वटा वैकल्पिक बाटो प्रयोग गरेर खुलाइँदैछ पूर्व–पश्चिम राजमार्ग

नवलपुरको विनयी खोला पुल भासियो, पूर्व-पश्चिम राजमार्ग बन्द